КУЧЕМ УВЕР

Республикын правительствыштыже: Машинам балконыш кораҥдышаш улыт мо?

Марий Эл вуйлатыше Александр Евстифеев 5 февральыште правительствын черетдыме кумдаҥдыме заседанийжым эртарен. Тудо чот луман игече шогымылан кӧра лекше нелылыкым кораҥдыме пашам кузе шуктымо дене кылдалтын. 

Республикысе район администраций вуйлатыше-влак дене селектор кыл ышталтын.

Корно кузе эрыкталтме нерген республикын транспорт да корно озанлык министрже Александр Сальников каласкален. Ойлымыж почеш, ты кечын корнылаште 184 единице технике пашам ыштен. Нуно йӱдымат эрыктеныт.

Игече локтылалтмылан кӧра нелылыкыш ик эн чот Звенигово районышто илыше-влак логалыныт. Кокшайск поселкышто 865 еҥ да Семеновка ялыште 200 еҥ тул деч посна кодыныт. Тиде чырым ик шагатат пеле жапыште кораҥден шуктеныт.

Трансформаторын пудыргымыжлан кӧра тыгак Медведево районысо кок ялыште икмыняр жап тул деч посна шинченыт. Республикын чоҥымо паша, архитектур да илыме вер ден коммунал озанлык министрже Михаил Леонтьевын палемдымыж почеш, экшык-влакым кораҥдаш чылаже 750 еҥан 196 аварийный бригадым чумыреныт.

Россий МЧС-ын Марий Элысе тӱҥ управлений начальникын алмаштышыже Николай Шатуновын ойлымыж почеш, чрезвычайный ситуаций лиймым шижтарышашлан тӱрлӧ мероприятий эртаралтеш. Нуно «чот ямде улмо» режим дене пашам ыштат.

Марий Элын образований да науко министрже Наталья Адамова палдарен: шочмын республикысе тунемме учрежденийлаште занятий-влак шке кумылын толмо режим почеш эртеныт. Йочам школыш колтышашым але укем ача-ава-влак шкешт рашемденыт.

Республикын тазалыкым аралыме министрже Марина Панькова лекше нелылык-влак нерген каласкален. Лум чот шындымылан да корным эрыктен шуктыдымылан кӧра Морко районышто ик пациент деке миен шуын кертын огытыл. Тиде амал дене шочмын телеконсилиумым эртареныт. Врач-влакын консультацийым жапыштыже пуымылан кӧра тиде ӱдырамашын состоянийже кызыт уда огыл семын аклалтеш.
Заседанийым иктешлышыжла, Александр Евстифеев исполнительный кучем орган-влакын вуйлатышыштлан ситуацийым контрольышто кучаш, корным эрыкташ, пӧрт леведышла гыч ийсӱсым кораҥдаш темлен. 


6 февральыште правительстве пӧртыштӧ адакат черетдыме заседаний эртыш. Тушто шочмын тарватыме йодыш йыр мутланымаш умбакыже шуйныш.

– Игече тӧрлана, но нелылык-влак кодыныт, – заседанийым почшыжла, палемдыш Александр Евстифеев.

Республикысе корнылаште кушкыжмо эрлан сӱрет могай улмо дене эн ончычак транспорт да корно озанлык министр Александр Сальников палдарыш. Палемдымыж почеш, лум утыжденат чот шындыме да эрыктен шуктыдымо участке-влакым рашемдышашлан район администраций вуйлатыше-влак дене эреак кылым кученыт. Шочмын йӱд сменыште корнылаште 99 единице технике пашам ыштен. Тыгодым 40 машина пудырген. Министр кушкыжмын 8 шагат эрлан 6 вере эрыктен шуктыдымо да нелылан шотлалтше кумдык кодын манын палдарыш. Тудым кече мучко шотыш конден шуктышаш улыт ыле. Нелылан шотлалтше кумдык-влак Волжский, Кужэҥер, Советский, Моро да Звенигово районлаште лийыныт.

Корным кузе эрыктыме да шотыш кондымо пашам Александр Евстифеев ГИБДД службо дене пырля приниматлаш темлыш.

Ты жаплан Йошкар-Олаште сӱрет могай улмо нерген мэр Евгений Маслов каласкалыш. Мутшо почеш, йӱдым рӱдолаште 53 единице спецтехнике корным эрыктен, тыгак ошма-шинчал вартышым шавен. Мэр техникылан пашам ышташ корно тӱрыштӧ шогышо машина-влакын чаракым ыштымыштым палемдыш да ГИБДД дене пырля нуным эвакуироватлаш тӱҥалме нерген каласыш. Ты шотышто Александр Евстифеев туран тыге каласыш:

– Те эн ончычак шапаш парковым ямдылыза, площадкым эрыктыза, а вара пеҥгыдын йодса. Еҥ-влак шке транспортыштым кушко кораҥдат? Балконыш мо? Еҥ-влак дене мутланаш, йӧным темлаш кӱлеш.
Александр Евстифеев правительстве пӧрт кумдыкым сайын эрыктымым палемдыш. Тыгодым ола тӱрыштӧ да частный секторыштат тиде пашам кӱлеш семынак шукташ темлыш.

Механизатор-влакын пашам ыштыме графикыштлан тудо кугу тӱткышым ойырыш. Неле технике дене ыштыше-влак палемдыме деч кужунжак ыштышаш огытыл манын палемдыш.

Умбакыже «Троллейбус транспорт» муниципал предприятий шотышто шочмын йоҥгышо ӧпке мут шотышто Евгений Маслов палемдыш:

– Теҥгечысе заседаний деч вара ме олан администрацийышкыже виктарыше компаний-влакын вуйлатышыштым ӱжынна да ты уверым нунын марте намиен шуктенна, задачым шынденна. «Вашкеполыш» станций шотышто. Машина каен кертдыме годым кушко йыҥгырташ кӱлмӧ нерген тӱҥ врач дене мутланенна. «Вашкеполыш» машинам шупшын лукташ тореш лийме шотышто служебный тергымаш кая. Титакан-влакым муына да мут кучаш шогалтена.

Тиде заседанийыште видеокыл йӧн дене Волжск, Козьмодемьянск, Звенигово ола ден чыла район администраций вуйлатыше-влак кушкыжмо эрлан нунын дене корным эрыктыме шотышто сӱрет могай улмо, нелылык кузе кораҥдалтме дене палдарышт.

Пытартышлан республик вуйлатыше палемдыш:

– Чыла вере корным эрыктыман. Иктаж нелылык лектеш да правительстве велым полыш кӱлеш гын, шып ида шинче.

Любовь Камалетдинова.

Опубликовать в Одноклассники

Добавить комментарий