КУЧЕМ УВЕР

Сайлымаш – 2018: Кажныже эскерыше лийын кертеш

Кугарнян Йошкар-Олаште, Творческий ушем-влакын пӧртыштышт, Марий Эл Республикын общественный палатыже  “2018 ийыште Россий Федерацийын Президентшым сайлымаш процессын общественный контрольжо» теме дене «йыргешке ӱстел» йыр мутланымашым эртарыш. 

Тидыже ӱмаште общественный эскерыше-влак шотышто федеральный законодательствыш вашталтышым пуртымо денат кылдалтын. Ынде лачшымак общественный палате эскерыше-влак дене пашам ышта. Избирательный комиссийлашке тудо эскерыше-влакым палемден кертеш. Тидыже сайлымаш процесс вошткойшо лийже манын ышталтеш.

«Йыргешке ӱстел» йыр мутланымашке общественный палате вуйлатышын пашажым шуктышо Герман Дементьев, внтуренний политике, верысе самоуправленийым вияҥдымаш да юстиций министр Михаил Данилов,  Марий Эл ЦИК председатель Ирина Татаринова, «Национальный общественный мониторинг» (НОМ) проектын регионысо координаторжо Ирина Петрова, общественный палатын комиссийжым вуйлатыше, пашаче группын председательже Ольга Полетило, тыгак кӱшыл тунемме учрежденийлаште пашам ыштыше ден студент, мер оргаизацийын еҥже-влак, икмыняр моло чумыргеныт ыле.

«Йыргешке ӱстелын» участникше-влакын палемдымышт почеш, независимый манме мер организаций-влакын еҥыштын сайлымаш кампанийын кузе эртымыжым тергымышт ик эн пайдале лиеш. Сандене республикысе сайлыме кажне участкыштат общественный эскерыше лийшаш. Тӱҥжӧ – Россий Президентым сайлыме годым тиде сомылым кундемыштына илыше кеч-могай еҥат шуктен кертеш.

Ирина Татаринова эскерыше-влакым темлыме порядкым шотыш налаш кӱлмым палемдыш. ЦИК тидлан кӱлеш материалым луктеш. Нуным Избирательный технологийым туныктымо Российысе рӱдерын (РЦОИТ) сайтыштыже муаш да сайлымашлан ямде улмым шке семын эртен ончаш лиеш. Марий Элын ЦИК-ыштыже аттестацийым эрташ гын, тудын пашаеҥже-влак Россий ЦИК-ын сертификатшым пуат. 

Ирина Петрован палемдымыж почеш, НОМ – Российыште общественный эскерыше-влакын эн кугу сетьышт. Тудо ятыр мер организаций ден чолга еҥ-влакым уша. НОМ деч эскерыше-влак сайлымаш кечын чыла гаяк избирательный участкыште лийыт. Кызыт тудын экспедицийже тӱҥалын. Мониторингым эртарыше-влак эн ончычак эн шуко вуйшиймаш пурымо Российысе олалашке каят. Икымше ола Вологда лийын. Ойлымыж почеш, Марий Эл гыч законым пудыртымо нерген увер пурен огыл.

Ольга Полетило палемдыш: общественный палатын эн тӱҥ задачыже – районлаште шукырак эскерыше лийшаш. Тидыже республикын кажне кундемыштыже сайлымаш чын эртымым пеҥгыдемда.

«Йыргешке ӱстелыш» погынышо-влак Марий Элын общественный палатыжлан «Национальынй общественный мониторинг» проектын еҥже-влак дене пырля республикын правительствыжын да Рӱдо сайлымаш комиссийын полшымышт дене 28 февральыште Йошкар-Олаште Общественный наблюдатель-влакын форумыштым эртараш темлышт.

Любовь Камалетдинова.

Опубликовать в Одноклассники

Добавить комментарий