ЯЛОЗАНЛЫК

Ялозанлык: Ушем вийым ушышаш

Марий Эл Республикыште Кресаньык (фермер) озанлык да ялозанлык кооператив-влакын ассоциацийыштым ыштыме. 

17 январьыште Марий Элын кресаньык (фермер) озанлыкше ден ялозанлык кооперативше-влакын еҥышт Агробизнес кадрым угыч ямдылыме Марий институтышто Ассоциацийын советшын заседанийышкыже погыненыт. Тушто Кресаньык (фермер) озанлык да ялозанлык кооператив-влакын ассоциацийыштым ыштыме шотышто учредитлыме документ-влакым приниматленыт, председательлан кресаньык озанлыкым вуйлатыше Григорий Александрович Петров-Чоткарым сайленыт.

Тиде ассоциацийыш 34 кресаньык (фермер) озанлык да ик ялозанлык коопреатив ушненыт. Нуно чыланат тӱҥ шотышто шӧрым ямдылыме да вольыклан кормам ситарыме пашам шуктат. Коклаштышт мӱкшым ашныше, пакчасаскам ончен куштышо-шамычат улыт.

Ассоциацийым вуйлатыше Г.Петров-Чоткарын озанлыкше У Торъял районышто верланен. Тудын 1000 гектар курал-ӱдымӧ мландыже уло. Тыгак 100 наре вуй тӱкан шолдыра вольыкым онча, ты шотыштак – 34 ушкалым. Озанлыкын тӱҥ пашаже – шӧрым ямдылымаш.

Кресаньык (фермер) озанлык да ялозанлык кооператив-влакын ассоциацийыштым ыштыме дене заседанийын участникше-влакым Марий Эл Республикын ялозанлык да продовольствий министржым алмаштыше Андрей Кондратенко саламлен да регионысо тиде секторым ончыкыжымат вияҥден колтымаште сеҥымашым тыланен.

Ялозанлык да продовольствий министерствын специалистше-шамыч изи форман озанлык вуйлатыше-влакым таче кечылан пӱсын шогышо да кӱлешан йодыш-влак дене палдареныт, кугыжаныш полышым, грантым, льготан кредитым налме йӧн-влак нерген каласкаленыт. Тыгак шошо агам эртарен колтымо, материально-технический ресурсым ситарыме нерген мутланеныт.

Кресаньык (фермер) озанлык да ялозанлык кооператив-влакын ассоциацийыштын заседанийыштышт Марий Эл Республик Кугыжаныш Погынын Аграрный комитетшын председательже Аркадий Новиков ден Агробизнес кадрым угыч ямдылыме Марий институтын ректоржо Юрий Новосёлов лийыныт.

М.ИВАНОВА.

Опубликовать в Мой Мир
Опубликовать в Одноклассники

Добавить комментарий