мисс колледжа
КУЛЬТУР ДА ИСКУССТВО

Уста шӱлышан пампалче-влак

И.С.Палантай лӱмеш колледжын концерт залыштыже калык ятыр погынен. Нуно ссузын эн мотор ӱдыржӧ-влакым ончаш толыныт. Конкурслык программым 4-ше курсышто тунемше  Е. Яковлева ямдылен. Тиде тудын выпускной квалификационный пашаже лийын. Пайрем моткоч веселан, оҥайын да ойыртемалтшын эртен. Тугеже Екатерина илышыште шке паша вержым муэш да сай специалист лиеш манын ӱшан уло.

Ты гана конкурсышто усталыкыштым, моторлыкыштым вич пампалче ончыктен. Эн ончыч нуно шкешт дене палдареныт, варажым ойырен налме профессийыште верыштым, умбакыжым могай профессионал лияш шонымыштым ончыктеныт.  Кумшо йыжыҥыште ӱдыр-шамыч пӱсӧ йодыш-влаклан вашештеныт. Тыгодым писын, чын да тыгодымак ойыртемалтше вашмутым пуаш кӱлын.

А кас тувыр дене лекмышт годым пампалче-влак сценыште лывыла ийыныт. Нунын моторлыкышт шинчам йымыктарен. Эсогыл пайремым вӱдышат икмыняр гана «йылмыжым йомдарен». Туге гынат ӱдыр-влак шке сылнылыкышт дене гына огыл, а уста улмышт дене калыкын да жюрин кумылжым налын моштеныт. Икте шӱшпык йӱкшӧ дене ныжылгын муралтен гын, весе мастарын кушталтен.  Тыгодым кажныжат мастарлыкым шуараш полшымылан туныктышыжлан таум каласен.

Но кеч-могай конкурсышто сеҥыше лийшаш. Сандене жюри кажныжын моторлыкшым аклен да икмыняр номинацийым палемден:  «Артистичностьын миссше» — Мария Загайнова (хоровой пӧлка, 4-ше курс), «Креативностьын миссше» — Наталья Охотникова (социал да культур паша пӧлка, 4-ше курс), «Грацийын миссше» — Антонина Шипицина ( театральный пӧлка, 1-ше курс), «Спонсорын миссше» — Сабина Абушова (эстраде пӧлка, 3-шо курс). А Екатерина Цапаева «Ончаш толшо-влакын симпатийышт» номинацийыште (хореографий творчестве пӧлка, 2-шо курс) ойыртемалтын. Тудак «Колледжын миссше -2017»  лийын.

Л.ШАБДАРОВА.

М.Скобелевын фотожо.

Снимкылаште: Екатерина Цапаева куштымашлан уло чонжым пӧлекла.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники