«МАРИЙ ЭЛ» ТАЧЕ

«Те мемнан шинчана ден пылышна улыда»…

Кажне ийын 13 январьыште, Россий Печать кечын, Марий Эл Республикым вуйлатыше республикысе журналист-влакым саламла да пашаште ойыртемалтше-влакым палемда. Тений тыгай мероприятий колымшо гана эртаралтын. 

«Ял озанлык пашам ворандараше, промышленностьышто, медициныште, образований ден науко отрасльлаште тыршыше-влакын пашашт неле, но нунын нерген сайын возашат куштылгыжак огыл. Сандене мо нерген возымым тыланда  сайын палыман. Ты але вес йодышым почын пуымо годым чын, тыматле улмыда – тиде тендан суапда, – палемден Печать кече дене саламлымыже годым республикым вуйлатыше Александр Евстифеев.

Вара тудо ты отрасльыште ойыртемалтше пашаеҥ-влаклан тауштен, сулен налме наградыштым кучыктен. Туштак Марий Эл Правительствын кодшо ийысе  «Марий Эл Республикым социально-экономически вияҥден толмым эн сайын ончыктен шогымылан» журналистике шотышто премийжын лауреатше-влакым палемден. «Экономике вияҥмым ончыктымо шотышто эн сай паша» номинацийыште «Край Сернурский» газет редакцийын корреспондентше Алевтина Вшивцева сеҥшыш лектын. «Ялозанлыкым ончыктымо шотышто эн сай паша» номинацийыште Марий Турек районысо «Знамя» газет редакцийын творческий коллективше ойыртемалтын. «Социальный сферым ончыктымо шотышто эн сай паша» номинацийыште  «Марийская правда» газет редакцийын пашаеҥже Дмитрий Шахтарин палемдалтын. Лач тудын материалже гыч ме Кужэҥер районысо Шӱшпык ялыште илыше Степан Эльтеров нерген пален налынна.  Тудо шкетын 10 ий наре корным чоҥен. «Тыгай сай пример эл мучко икмыняр вере лийын гынат, землякнан суапшым ужын да  палемден ончыктымаште журналистын надыржым палемдыманак. Вет илалше ты еҥ корным веле огыл ыштен, эше верысе ерым эрыктен да шке илемжым тӱзатыме пашам шуктен толеш. Тудым национальный талешке семын ончыктымымат палемдыман. Правительствыш ӱжмеке, ме эшежым весымат пален налыннна: корным ышташ КАМАЗ водитель-влакым полшаш йодын. Тӱлаш оксаже лийын огыл, сандене тудо парымжым мӱй дене пӧртылтен. Журналист-влак лач тыгай пример-влакым ужын да тидын нерген серен моштышо лийшаш улыт», – каласен Александр Александрович.

Премийым налше-влак коклаште «Марий Эл» газетын журналистше Алевтина Байковат лийын. Тудо «Культур илышым ончыктымо шотышто эн сай паша» номинацийыште сеҥен. Шкенан коллегынам уло кумылын саламлена да сай ончыкылыкым тыланена.  

«Республикысе калык-влакын национальный ойыртемыштым ончыктымо   шотышто эн сай паша» номинацийыште ты гана ВГТРК-ан «Марий Эл» ГТРК-ажын национальный вещаний группыжын корреспондентше Людмила Васютина сеҥен. А теве «Кугарня» газетын коллективше «Йоча да самырык-влакын проблемыштым ончыктымо шотышто эн сай паша» номинацийыште ончыко лектын.

Ты гана эн сай журналист семын «Марий Элын шӧртньӧ пераже» дене «Марийская правда» газетын журналистше Константин Терехов палемдалтын.

Шуматкечын кастене М.Шкетан лӱмеш марий национальный драме театрыште Российысе Журналист ушемын Марий пӧлкаже Печать кечылан пӧлеклалтше торжественный мероприятийым эртарен.  Тӱрлӧ министерстве ден ведомство вуйлатыше-влак деч саламлымаш, поро тыланымаш йоҥген. Нунын пашашт нерген возен шогышо журналист-влаклан шуко пӧлекым кучыктеныт. Мемнам саламлаш Марий Эл Республикын Правительствыжын председательжын икымше алмаштышыже М.Васютин, Кугыжаныш Погын вуйлатышын алмаштышыже А.Иванов, тӱвыра, печать да калык-влакын пашашт шотышто министр К.Иванов да молат толыныт ыле. Сай пашашт дене  ойыртемалтше-влаклан тыгак Чапкагазым, Тауыштымашым кучыктеныт. Пайремым М.Шкетан лӱмеш театрын артистше-влак И.Соловьев, М.Воронцова, И.Смирнов йоҥгалтарыме мурышт дене сӧрастареныт.

Кажне ийын Россий Журналист ушемын Марий пӧлкаже тыгак журналист-влаклан конкурсым эртара. Ты пайрем касыште тушто сеҥыше-влакым палемдышт. Чаманен каласыман, тений мемнан редакцийын пашаеҥже-влак ты радамыш логалын огытыл, но коллегына-влак верч садак куанена. Тыге «Перан порылыкшылан» номинацийыште «Кугарня» газетын журналистше Эльвира Терентьева, «Перан пӱсылыкшылан» номинацийыште «Марий Эл» ГТРК-ан корреспондентше Анастасия Барауля, «Морко мланде» райгазет, «Перан илышыште полшымыжлан» «Семейная газета» савыктышын пашаеҥже Маргарита Терехова, «Самырык пера» номинацийыште  Кужэҥер районысо «Заря» газетын корреспондентше Людмила Сорокина палемдалтыныт.

Таклан огыл журналист-влакым саламлыме годым эре гаяк «перада пӱсӧ лийже» манын тыланат. Вет нунын кажне ойышт еҥ-влак деке миен шушаш. А шомак дене айдемым куандарашат, пушташат лиеш манын таклан огыт ойло. Сандене кажне шомак журналист деч тӱткылыкым йодеш: пера веле огыл, шомакшат пӱсӧ лийшаш. Тидым газетыште, телевидений ден радиошто ыштыше кажне пашаеҥ умыла да шке пашаштыже шукташак тырша. Таклан огыл пайрем годым саламлаш лекше тӱвыра пашаеҥ-влак профсоюз рескомын председательже Владимир Ушнурцев журналист-влакым «те мемнан шинчана ден пылышна» улыда манын ойлыш.  

СМИ пашаеҥ-влакым республикысе почто управлений гычат саламлаш толмо куандарыш. Вет лач связист-влакын полышымышт дене газетна лудшо-шамыч деке миен шуэш.

С.Носова.
М.Скобелевын фотожо.

Опубликовать в Одноклассники

Добавить комментарий