ПРАВОСЛАВИЙ

Шочмо элым аралаш туныктат

Волжский районысо Купсола селасе  Юмым шочыктышо Эн святой Аван Леведмыже лӱмеш черке пелен казачествын Приволжский пӧлкажым почыныт. 

Каласен кодыман, Юлсер кундемыште казачествын кок пӧлкаже уло, тидын деч посна эше Волжск олаште. Купсола черке 1914 ийыште ышталтын. Моло черке семынак тудо кумлымшо ийлаште петыралтын улмаш. Тудым 1997 ийыште угыч уэмден олмыктымо паша ылыжын. Варажым ешртыш оралте-влакым нӧлтеныт. Таче тушто икмыняр оралте уло. Черке пелен илалше-влаклан пӧртымат,  рушарня школымат почыныт. Кызыт тушко мийымеке, изирак монастырьыш логалмыла чучеш. Тидымак приходын настоятельже протоиерей Евгений Усков пеҥгыдемда.

А ынде тушто казачествын пӧлкажын еҥже-влакат погынат. Вара могай амал дене тудо ышталтын? Йошкар-Ола да Марий митрополит Иоаннат ты пашам тӱҥалаш благословенийым пуэн. Евгений ача казачествын ты пӧлкажын духовникшылан шотлалтеш. Тӱҥ шонымашыже – самырык-влакым шочмо элым йӧратыме да тудым аралаш ямде лийме шӱлышеш шуараш. Рушарня школыш коштшо-влак коклаште ты шӱлышыжым шарат да нуным таза илыш-йӱлам вӱдаш да шкем тазалык шотышто шуараш туныктат. Тиде амал денак кучедалмашын тӱрлӧ видше дене тренировкым эртарат, кеҥежым гын пасу условийышкат луктыт. Казак радамыш кызытеш кандаш еҥ ушнен. А тыгай тренировкышкыжо рушарня школын тунемшыже-влак, йолташышт коштыт.

С.Носова.

Опубликовать в Одноклассники

Добавить комментарий