РУБРИКИ

Пагытлан келшышын: У ий каныш – ямле жап

Рошто кастене пӧрт воктене петардым туге пудештарышт, эсогыл кудывечыштак шогышо кок машинан сигнализацийышт туге васараш тӱҥальыч да окнаш ончалде шым чыте. Ийготыш шудымо рвезе-влак орадыланат улмаш. Нуным тушеч машинан озаже-влак поктен колтышт. 

Чынжымак, школышто тунемше-влакын кызыт пеш ямле пагыт. Кеч южыжо тунемашат тӱҥалыныт, а южышт каят веле. Но каныш кечылаште ача-ава-шамыч пеленыштак каненыт, сандене шочшышт-влаклан пешыже орадыланаш  пуэн огытыл.  Уло еш дене пырля ече дене кошташ, курык серыш мунчалташ каяш лийын. Мо-гынат,  пачерыште пайрем ӱстел воктене шинчен шер темын гын,  пырля каналташ Йошкар-Олаште йӧн лийынак. Ече, коньки, «ватрушко» дене ынет мунчалте ыле гын, бассейныш, спортзалыш каен кертыныт. Теве меман кинотеатрлаште Российысе баскетболист-влак нерген оҥай у кином ончыкташ тӱҥалыныт. Ужалыме ик рӱдер воктене эсогыл Байкал гыч кондымо нерп-влакын шоуштым ужаш йӧн ыле.  

 А Изи Какшан серыште гын эр гыч кас марте эре йӱк-йӱан шоктен, кечыгут  весела лийын. «Ватрушко», тюбинг манмет дене мунчалтеныт. Роштолан тушто руш калык йӱла дене келшен толшо модмашат эртыш. Шуко калык погынен ыле. Ончаш толшо-влак шкештак уло кумылын шкештак модшо-влак коклаш ушненыт. Эшежым каласен кодыман: ты модмашым республикысе туризм отрасльым вуйлатыше-влак турист событий семын йот кундем гыч толшо-влаклан ончаш толаш темлаш тӱҥалнешт.  

С.Носова.

Опубликовать в Мой Мир
Опубликовать в Одноклассники

Добавить комментарий