УВЕР ЙОГЫН

Чодырам шагалрак шолыштыт

1-15 декабрь гутлаште Марий Эл Республикын Пӱртӱс поянлык, экологий да йырым-йырысе средам аралыме министерствыжын кугыжаныш инспекторжо-влак моло ведомство полшымо дене чодырам закондымын руымым тергеныт. 

Вич тыгай случай тӱжваке лектын. Шолып руымо чодыра кугыт 18,6 кубометрыш шуын. Чодыра фондлан 22737 теҥгеаш эҥгек ышталтын. Закон почеш титакан-влакым мут кучаш шогалтат.

 Тений чылаже 200 наре тыгай рейдым эртарыме. 50 ганаже кугыжаныш инспектор-влак дене пырля полицийын, ГИБДД-н пашаеҥже-влак лийыныт. Сай могырым иктым палемдыман: пушеҥгым шупшыктышо транспортым виктарыше-влакын документышт закон дене келшыше лийын.

С.Носова.

Опубликовать в Мой Мир
Опубликовать в Одноклассники

Добавить комментарий