СПОРТ

Марий Элын эн тале спортсменже-влак тӱнямбал кӱкшытыштат, Российыштат…

Тачысе саманым, спорт илышым, ты сферыште тӱнямбалсе умылыдымашым шотыш налаш гын, спортсмен-влаклан сай кӱкшытым, мастарлыкым ончыкташ куштылгыжак огыл. Но мо-гынат Марий Элыште спорт илыш вияҥеш, ӱдыр-рвезе-влак тӱрлӧ видыште сай результатым ончыктат, республикым, эсогыл Российым тӱнямбалне чапландарат. 

Тиде ийын спортын тӱрлӧ видше дене Российын сборный командыштыже витле утла спортсмен, ныл тренер улыт. Республикыште Россий да регион-влак кокласе кӱкшытан 36 таҥасымаш эртаралтын. Тӱрлӧ видыште да тӱрлӧ таҥасымаште спортсмен-влак 282 (102 шӧртньӧ, 94 ший, 81 бронзо) медальым сеҥен налыныт.

Эн тале, писе куштылго атлет  

Кажне ий мучаште идалыкым иктешлыме семын эн тале спортсмен-влак дене палдарена. Эртыше идалыкыште сай кӱкшытыш шушо семын спортын королевыжлан шотлалтше видыште, куштылго атлетикыште (йодыштмо почеш), шуко еҥ ойыртемалтше да тале семын адакат Шернур кундемын тале ӱдыржӧ, тӱнямбал спорт мастер Людмила Лебедеван (тренерже С.Черепанов) лӱмжым каласен. Тудо икмыняр ий почела «Идалыкын эн сай спортсменже» семын палемдалтын. Теният ты рейтингыш логалын. Людмила леведыш йымалне куржталме дене Российын чемпионатыштыже ший призёр лийын. Кокымшо верым тудо 5 километрыште сеҥен налын. Тиде  дистанцийым 15 минутат 52 секундышто эртен.

Тиде видыш ушнышо у да тале куштылго атлет Кирилл Семёновын (тренерже К.Лукьянов) результатше куандарыше. Провой кундемын эргыже 2017 ийыште – юниор-влак коклаште Россий да Юл кундем первенствын сеҥышыже. Тиде тургымышто тудо элнан молодёжный первенствыжын финалистше да юниор-влак коклаште леведыш йымалне куржталме дене Россий первенствыжын ший призёржо лийын. Куштылго атлетике дене юниор-влак коклаште Российын сборный командышкыже пурталтын.

– Тыршыше рвезе. Спортын кеч-могай видше дене лийжак манын ямдылалтат гын, результат лиеш, лектыш куандара. Икте сеҥымашке ондакырак толеш гын, южыштлан жап шукырак кӱлеш. Сандене ойырен налме пашам йӧратен ыштыман. У ийыште чылалан пеҥгыде тазалыкым, шонымашке шуаш тыланем, – манеш тренерже.

Кумданрак — «Марий Эл» газетын
2017 ий 30 декабрьыште лекше номерыштыже лудын кертыда.

 

Е.Эшкинина.

Опубликовать в Мой Мир
Опубликовать в Одноклассники

Добавить комментарий