ЕШ ИЛЫШ

Ойыртемалтше еш: Сылнылык торашке волгалт сымыстара  

У Торъял поселкышто шуко пачеран ик пӧртын икымше пачашыштыже верланыше пачер чотак ӧрыктарыш. Тушто У ий вашеш кок окна янакым тӱжвал да балконым кӧргӧ велым кож укш, йошкар тасма, модыш, гирлянде дене сӧрастарымым ужын, ойлышаш мутат йомо. Вет мом шылташ: мемнан калык весыным, манмыла, йодде налын каяш йӧрата. Сандене кокымшо, кумшо пачашысе пачер окналам тыге сылнештарат гын, умылаш лиеш ыле. Но икымше пачашыште тидым ышташ тоштмо ӧрыктарыш да пачер оза-влак дене палыме лияш таратыш. 

— Эргым ден коктын лӱмынак Рошто пайрем вашеш йот эллашке, поснак Европыш, кум гана миенна.  Австрийыште, Веныште, Прагыште, Дрезденыште, Мюнхеныште, Сербийыште, Черногорийыште, ятыр моло вере тиде пайрем вашеш тунар чот сӧрал лиеш! Тидым мут дене каласен мошташат огеш лий. Чылажымат шке шинча дене ужаш кӱлеш! – куанен каласкалаш тӱҥале 70 ияш Галина Ивановна Загайнова. — Мемнан денат мотор лийже манын, ты сӧраллыкым Европо гыч «кондаш» кумылна лектын да нине элла гыч искусственный кож укш ден сӧрастарышаш ӱзгар-влакым лӱмынак наледен конденна да кажне ийын У ий вашеш пачер окнанам тӱжвал велым сылнештарена.

Галина Ивановнан каласкалымыж почеш, тӱҥалтыште ӱчым ыштылаш да окна янак гыч укш-влакым «сӱмырал кудалташ» лумымат кышкеныт, эртен кайыше-влакын кумылыштым нӧлташ манын, чылажат сайынак койжо шонен, балконыштым почын шынденыт улмаш да южышт, тушко пурен, пеледышыштымат кӱрын каяш, моторлыкым моло семынат локтылаш тӧченыт. Вате-марийлан эсогыл эскерашыштат логалын. А пытартыш жапыште еҥ-влак тидым аклаш тӱҥалыныт.

— Пычкемышалтмеке, гирляндым чӱктена да балкон ден окна-влак тӱрлӧ тӱс дене волгалтыт. Санденак еҥ-влак толыт да поснат, икшывышт да уныкашт дене пырлят фотографироватлалтыт, сӧраллыклан тауштат, — ойла чолга ӱдырамаш.

 

Кумданрак — «Марий Эл» газетын
2017 ий 30 декабрьыште лекше номерыштыже лудын кертыда.

Любовь Камалетдинова.
Авторын фотожо.

Опубликовать в Мой Мир
Опубликовать в Одноклассники

Добавить комментарий