КАЛАСЕ, "МАРИЙ ЭЛ" ТАЗАЛЫК

Каласе, «Марий Эл»…: Тазалыкышт могайрак?

Ноябрь кыдалне Козьмодемьянск кугорнын 64-ше километрыштыже лийше шучко корно азапыште нелын сусыргышо-влакын тазалыкышт могайрак? 

И.Кораблёв.
Морко район.

Йодышлан Марий Эл Республикын тазалыкым аралыме министрже М.Панькова вашешта:

– 16 ноябрьыште Килемар районышто лийше автокатастрофышто 15 еҥын ӱмыржӧ кӱрылтын, ныл пассажир нелын сусырген. Иктешлен каласаш гын, сусыргышо-влакын тазалыкышт пеҥгыдемын толеш, нунын илышышт шотышто ынде лӱдшаш уке.

Кодшо арнян шым ияш рвезым мӧҥгышкыжӧ колтымо. Кызыт тудын тазалыкшым кок врач – участкысе педиатр да Республикысе йоча эмлымверын ортопедше – эскерат. 41 ияш ӱдырамашымат кодшо арня мучаште эмлымвер гыч лукмо. Тудат умбакыже мӧҥгыштыжӧ эмлалташ тӱҥалеш. Тазалыкше кечын пеҥгыдемеш гынат, 17 ияш рвезылан стационарыште эше иктаж кок арня кияшыже логалеш. Казаньыште эмлалтше 14 ияш ӱдырын тазалыкшымат врач-влак сай семын аклат.

М.ИВАНОВА.

Опубликовать в Мой Мир
Опубликовать в Одноклассники

Добавить комментарий