СОЦИАЛЬНЫЙ ИЛЫШ

Пӱсӧ йодыш: Амалжым манеш-манеш ыштен

Марий Эл Республикын Тазалыкым аралыме министерствыжын пашаеҥже ден У Торъял районысо рӱдӧ эмлымверын вуйлатышыже-влак У Торъял посёлкышто районысо калык дене вашлийыныт. Тидланже палыдыме еҥ-влакын эмлымверым петырыме шотышто манеш-манешым шаркален коштмышт амалым ыштен. 

Вашлиймаште У Торъял районысо рӱдӧ эмлымверын тӱҥ врачше Владимир Фадеев медицине тӧнежын тачысе кечыже да ончыкылыкшо нерген радамлын каласкален. Эмлымверым ныл ий ончыч капитально олмыктымо. Кодшо ийын кызытсе жаплан келшыше установко-влак дене шыҥдарыме стоматологий отделенийым почмо. Тылеч посна тӧнежлан «вашкеполыш» у машинам ойырымо, моргым олмыктымо, шокшым регулироватлыме узелым шындыме. Эмлымверын вуйлатышыже-влак кугу тӱткышым чер профилактикылан ойырат, сандене поснак амбулаторно-поликлинический пашам вияҥден колташ тыршат.Таче кечылан клинический лабораторийым уэмдыме, тушко анализым кӱчык жапыште да палынак раш ыштен кертше биохимический анализаторым да ИФА аппаратым шындыме. Вӱргорно давленийын да ЭКГ-н суткаш мониторингыштлан аппаратым налме. Торгым эртарыме, да лишыл жапыште тӧнежыште дентальный у рентген аппаратым вучат. Ынде кадрым ситарыме йодышат тынарак пӱсын ок шого: эмлымверыште психиатр, отоларинголог пашам ышташ тӱҥалыныт, вашкеполыш бригадым эше ик фельдшер дене вияҥдыме. Эмлымверыште у аптечный пунктым почмо. Чыла тидыже районысо калыклан диагностике сынан шымлымашым верыштак эрташ йӧным ышта. Тазалыкым аралыме отрасльым оптимизироватлымылын кӧра У Торял эмлымверыштат койко фондым иземдыме, но тыгодым ик медицине пашаеҥымат паша деч посна кодымо огыл.

«Тазалыкым аралыме министерстве ден Марий Эл правительстве У Торъял эмлымверым петыраш палемден огытыл, – манын тазалыкым аралыме министрын алмаштышыже Ангелина Ушакова. – Тиде тӧнежыште амбулаторно-поликлинический звеном пеҥгыдемдышашлан кызытсе жаплан келшыше УЗИ аппаратым налме йодмаш ончалтеш. Стационарыш шодын искусственный вентиляцийже кокымшо аппаратым шындыме йодышымат лончылаш тӱҥалына. Лишыл кечылаште эмлымверыш «вашкеполыш» у машина толын шуэш. 2018 ий гыч У Торъял районысо фельдшер-акушер пунктласе кадр йодышым «Ялысе фельдшер» федеральный программе полшымо дене решатлаш шонена».

Тиде вашлиймаш кок велланат пайдале лийын: районысо калык тургыжландарыше йодышыжо-влаклан вашмутым колын, а министерстве ден эмлымверын пашаеҥже-влак медицине обслуживанийым саемдышашлан эн ончычак решатлаш кӱлшӧ проблеме-влакым палемденыт.

Тазалыкым аралыме сферысе ситуаций  – Марий Эл Республикым вуйлатыше А.Евстифеевын контрольыштыжо.

М.ИВАНОВА.

Опубликовать в Мой Мир
Опубликовать в Одноклассники

Добавить комментарий