«МАРИЙ ЭЛ» ТАЧЕ

Журналист-влак … повар лийынна

Журналист паша дене кушто гына лияш, мом гына ужаш да ыштен ончаш огеш логал?! Теве кодшо кечылаште Россий Журналист ушемын членже-влак – телевидений ден газетлаште пашам ыштыше-шамыч – Йошкар-Олаште шукерте огыл почылтшо «Дело вкуса» кулинар студийыште тӱрлӧ кочкышым ямдылаш тунемна. Студий вуйлатыше Елена Казанкина мыланна мастер-классым эртарыш. 

Ямдылышаш кочкыш-влакын лӱмыштак журналист-влаклан келшыше ыле да санденак утларак сымыстарен. Мутлан, чыве шыл гыч ямдылыме рулет «Сюжет» маналтын, салат – «Репортаж», а десерт «Эссе» ыле. Нуным ыштен ончымет кузе огеш шу?! Санденак журналист-влак, чыланат ончылсакышым ӱшталын, ик жаплан повар лийна да пашалан рӱж пижна.

Эн ончычак рулетым ямдылышна, тылеч вара десертым, пытартышлан салатым ыштышна. Плита йыр вераҥдыме кугу-у ӱстембалне икте чыве гыч лум кораҥдыле, весе тудым чӧгыт дене перкалыш, кумшо ӱмбалым луген, нылымше поҥгым, шоганым эрыктыш, визымше пӱчкедыш, кудымшо чыла тидым жапын-жапын фотографироватлыш… Икманаш, погынышо 13 еҥланат паша ситыш.  Тыгодым кажныжым ямдылыме годым мемнам Елена кочкаш шолтымо годым кӱлеш лийын кертше тӱрлӧ деч тӱрлӧ секрет дене палдарыш.

Кочкыш-влакым ямдылен шуктымеке, ӱстелым моторын сӧрастарен, чылан пырля погынен шинчын, шке мастарлыкнам аклен, тамлен ончышна. Кажныже тунар тамле ыле-е!

 Икманаш, шкеак ямдылышна, шкеак кочкын кайышна. Тидын денак кулинар студий кафе деч ойыртемалтеш. Кафеште ыштен пуымым, ямдым, кочкат, а тыште шке ыштет, вара шкеак сийлалтат. Моткочак оҥай да ойыртемалтше йӧн.  

Ты кечын ме мом ямдылышна – нине кочкыш-влакын рецептышт дене 14 декабрьыште лекше «Сурт-пече» газетыште палдаренна да тыландат ямдылен ончаш темленна. Мемнан семынак тыландат чот келша, шонена.

          Любовь Камалетдинова

Если вы нашли ошибку, пожалуйста, выделите фрагмент текста и нажмите Ctrl+Enter.
Опубликовать в Мой Мир
Опубликовать в Одноклассники

Добавить комментарий