СОЦИАЛЬНЫЙ ИЛЫШ

Пенсий деч посна кодмо деч шекланыза

Ӱмаште Марий Элыште сулен налме канышыш лекташ шушо 44 еҥлан Пенсий фонд пенсийым пуаш тореш лийын. Амалже: я стаж, я пенсий коэффициентын чотшо (балл) ситен огыл. Эн шуко Йошкар-Олаште илыше еҥ-влаклан пенсийым пуаш тореш лийыныт. 9 еҥын тидлан стажше ситен огыл гын, 15 еҥын – баллже.

Ушештарена: ӱмаште ийгот шумо дене пенсийыш лекташ (55 ияш ӱдырамашлан  да 60 ияш пӧръеҥлан) 7 ий паша стаж ден 9 балл кӱлыныт.

Стаж, а поснак балл ситыдыме  утларакше  пашашке официально огыл пурымо дене кылдалтын.  Пенсий страхованийлан  взносым пашам пуышо официальный пашадар гыч веле колтен шога. Тиде «ош» суммо гыч веле  пенсийым налаш правам пуышо окса чумырга.

Туге гынат южо пашаеҥже ончыкылыкше нерген огеш шоно. Тидым статистике  пеҥгыдемда. Республикыште 14 тӱжем еҥ пенсийым пашам ыштымылан тӱлымӧэн изи пашадар кугыт  (МРОТ) деч изиракым налеш. Стройкышто, пилорамыште але транспортышто пашам ыштен, тылзыште 7,5 тӱжем теҥге дечат шагалрак огыт нал докан. Пашадарыштын кугурак  ужашыжым нунылан  конвертыште кучыктат.

Ончыкылык пенсионер деке  йодмаш кажне ийын пеҥгыдырак веле лиеш. Тений страховой пенсийым  налаш 8 ий стаж да 11,4 баллат сита гын, 2015 ийыште шагал  гын 15 ий стаж да 30 балл кӱлеш лиеш.

Мыняр ий стаж да балл погынымым ПФР-ын es.pfrf.ru. сайтыштыже гражданинын личный кабинетыштыже  терген кертыда.

Е.Садовин.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники