МАРИЙ ЙӰЛА МЕР ИЛЫШ

Тӱрлӧ тӱсан Марий Эл: «Марий ушем» чыла марийым ушышаш…

Кодшо рушарнян Йошкар-Олаште «Марий ушем» региональный мер организацийын отчёт да сайлымаш конференцийже эртен. Тушто 140 еҥ участвоватлен. Тышечын 103 енже делегат лийын гын, молыжо — уна-влак. Киров область, Чуваш, Татарстан республикла гыч толыныт.   Мутлан, татар делегаций лу еҥан лийын. Мо оҥайже: нуно ныл татар мер организаций гыч лийыныт. 

Мо вигак шинчаш логале: форумын участникше-влак коклаште ты гана Марий Эл Правительствын, Марий Элын Тӱвыра, печать да калык-влакын пашашт шотышто министерствын еҥже-влак лийыныт. Министерствыште национальный йодышлан вуйын шогышо пӧлкам вуйлатыше Игорь Садовин Марий Эл Республик вуйлатыше А.Ефстифеевын участник-влакым саламлыме мутшым лудын пуыш. Республикысе у кучемын марий мер толкынлан тыгай тӱткышым ойырымыжлан куаныде огеш лий. Тыгайже пытартыш ийлаште лийын огыл, палемдышт ушемын еҥже-влак. Мутат уке, тидыже ик эн тошто мер  ушемын пашажым палемдыме дене кылдалтын. Вет ты марте республикын пытартыш вуйлатышыже тудым шотышкат налын огыл. Эсогыл, кодшо ийын марий шӱлышан ты организацийлан 100 ияш лӱмгечыжым палемдаш верымат пуэн огытыл. Вуйлатыше вашталтме дене гына мерориятийым эртараш республикысе мер-политик рӱдерын омсаже почылтын. Тидын нергенат шке отчет докладыштыже ушем вуйлатыше Владимир Козлов чон коржын палемдыш.

Эртыше жапыште ушемын вораҥдыме пашаже тӱҥ шотышто республикысе кучем дене ик ойыш шуын кертдыме шӱлышеш эртен. «Кугыжаныш кӱкшыт гычак чарак ышталтын»,- палемденыт участник-влак. — Кеч ушемын еҥже-влак тушко ятыр гана шуко сай темлымаш дене лектеденыт. Сандене шуко нелылык лийын. Туге гынат организацийын ыштыме пашажым конференцийын участникше-влак сайлан шотлышт.

А пашаже ышталтынак. Тачысе саманыште шийвундо деч посна нимом от ворандаре. А оксаже тӱҥ шотышто тиде ушем член-влакын взносышт да спонсор-шамычын полышышт лийын. Мом вара ыштыме? Спонсор окса кӱшеш гына ушемын 20 наре флагшым ямдылыме. Верлаште лӱмлӧ марий еҥ-влаклан шарнымаш ятыр оҥам пижыктыме. Кажне ийын Киров область Полтыш курыкышто верланыше историй-тоштер комплекс могай-гынат у элемент дене пойдаралтеш. Волжский районышто Чоткар патырым чапландарыме дене кылдалтше проект илышыш шыҥдаралтеш…

Кумданрак — «Марий Эл» газетын
2017 ий 16 декабрьыште лекше номерыштыже лудын кертыда.

Светлана Носова.
М.Скобелевын фотожо.

Опубликовать в Мой Мир
Опубликовать в Одноклассники

Добавить комментарий