МАРИЙ ТӰНЯ МЕР ИЛЫШ

Йӱлана тек илана: Шочмо йылмына куатле лийже манын

Кодшо рушарнян марий калыкнан йылмыж дене кылдалтше кугыжаныш пайремым – Тиште кечым –  палемдышна. Арня кыдалне тудлан полеклалтше шуко мероприятий эртыш. Тушко марий рӱдоласе ятыр тӱвыра да образовательный учреждений, мер ушем чолган ушненыт. Кажне мероприятий марий йылмым арален да вияҥден толмашке могай- гынат надырым пыштен. 

Эн кугуракше-влакым шергалын лектына. Ончыч кажне кумылан еҥлан ушнаш да марий йылмым палымыжым тергаш йӧным пуышо «Марла чын возена» диктантым ончыктыман. Тений тудо экологий темылан пӧлеклалтын ыле. Тушко 1000 утла еҥ ушнен. Марий кугыжаныш университет ден Марий тӱвыра рӱдер ынде визымше гана пырля эртареныт.

Вес кечынже В.М.Васильев лӱмеш йылмым, сылнымуытым да историйым научно-шымлыше Марий институт тыгак шочмо йылмынам вияҥдыме да марий калыкнан историйжым шергалме дене кылдалтше «йыргешке ӱстелым» да семинарым эртарен. Ты кечынак М.Шкетан лӱмеш марий национальный драме театрыште марий тӱрызӧ  Ираида Степанован «Боги в марийской вышивке» у книгажын презентацийже эртен. А вара театрын коллективше турист-влакым вашлияш ямдылыме посна программыж дене палдарен. «Шорыкйол» пайремым эртарымышт поснак келшыш.

 С.Г.Чавайн лӱмеш калыкле библиотекын пашаеҥже-влакат  лудшо-шамычлан оҥай программым ямдыленыт ыле: марий тамгамат «сӱретлыктеныт», марий калык вургем, кухньо денат палдареныт, тӱрлӧ экскурсийым,  викториным,  конкурсым эртареныт. Районлаштат марий йылме дене кылдалтше мероприятий-влак эртеныт.

Тиште арням рушарнян М. Шкетан лӱмеш марий национальный драме театрыште торжественно иктешленыт. Марий интеллигенцийым саламлаш Марий Эл Республик вуйлатыше Александр Ефстифеев толын ыле. Погынышо-влак дене пырля «Ме марий улына» фото, книга выставкым ончал савырнен.

 – Мыят пайремлымашке ушнынем. Тиште – тиде коммуникацийын пеш кӱлешан йӧнжӧ. Шкежат электрон возымашлан огыл, утларак книгалан ӱшанем, вет тудо курымашлык. Вес ийын мемнан библиотекна-влакым марий книга-шамыч дене пойдарыме нерген тӱвыра министр дене мутланенна, тидым илышыш шыҥдарена. Тиде теме моткоч кӱлешан, вет кагаз у тукымлан историйым арален кодаш полша, – палемден республик вуйлатыше.

А.Ефстифеев шкежат книга ончерыште рушла-марла да марла-рушла мутерлам, марий эпосым налын. Мучаште тудо палемден: лишыл жапыште Марий Эл правительствын полшымыж дене марий тӱр да национальный костюм дене кылдалтше календарьын презентацийже лийшаш.  

Ончыч пайремыш погынышо-влак театрын воштончыш фойештыже артист, мурызо, поэт, почеламутым ойыртемалтшын лудшо-влакын мастарлыкыштым ончен кертыныт. А вара «Мунло» интеллектуальный модыш тӱҥалын.  Тудым Марий тӱвыра рӱдерын пашаеҥже-влак эртареныт. А участник-влаклан марий сылнымут, историй, йӱла дене кылдалтше йодыш-влакым лӱмлӧ ученый, историй науко  кандидат-влак С.Свечников, Н.Попов ямдыленыт ыле. Сандене йодыш-влак куштылгыжак лийын огытыл. Чылаже куд еҥан шым команде участвоватлен: «Чумбылат» (Кужэҥер район), «Юл куат» (Звенигово район), «Юл марий» (Волжский район), «Маrutytӧt»(МарГУ), «Мер Каҥаш», «Марий самырык тукым слёт» да «Серызе» (журналист-влак). Пытартышыштыже «Марий Эл» газетын журналистше-влакат лийынна.

Гран-прим Волжский вел гыч толшо уна-влак сеҥен налыныт. Икымше верым «Мер каҥаш», кокымшым «Чумбылат», кумшым «Серызе» налыныт. Чыла командылан Марий Элын энциклопедийжым да именной сертификатым кучыктеныт. А гран-прим налше командылан кубок логалын.

 Вара пайремын торжественный ужашыже театрын залышкыже куснен. М.Шкетанын «Эреҥер» пьесыж почеш шындыме постановкым ончымо деч ончыч   Тиште арняште ойыртемалтше-влакым палемденыт. Туштак Марий Эл Республик вуйлатышын икымше алмаштышыже М.Васютин композитор Валерий Кульшетовлан «За заслуги перед Марий Эл» орденын медальжым кучыктен.

Светлана Носова.
М.Скобелевын фотожо.

Опубликовать в Одноклассники

Добавить комментарий