ТАЗАЛЫК

Ялысе эмлымверыште: Пациент ончылно веле огыл, Юмо ончылнат

Тиде манеш-манеш калыкыште шукертак коштеш: республикысе иктаж районышто у ФАП-ым торжественно почмо деч вара тушко вераҥдыме чыла гаяк медицине оборудованийым пуйто тыгай сынан вес мероприятийыш наҥгаят… 

– Ой, уке! Мемнан дене тыгай лийын огыл! ФАП-ым тӱҥалтыш гычак мо дене шыҥдарыме гын, а тиде – гинекологий кресле, кварц, АЛМАГ аппарат-влак, электрон виса да шуко молат, чыланат кызытат тугак шинчат, – мане Оршанке районысо Нужавалак ФАП-ын медсестраже Вера Иванова.

Тиде кундемын илыш корныжым шергалаш гын, медпункт 1946 ий гыч пашам ышта. 70 утла ий жапыште тудо тӱрлӧ пӧртыштӧ верланен, а кодшо ий августышто чылт у оралтыш куснен. ФАП деч кодшыжым, кум пачашан илыме пӧртын икымше пачашыштыже верланыше кум пӧлеман пачерым, Кугу Кугланур ял гыч шуко шочшан Токаревмыт ешлан пуаш ыштыме.     

У ФАП – уак: волгыдо, йоҥгыдо, йӧнан да шокшо. А эше мотор! Тӱҥ фельдшер Снежана Ямбасова ден медсестра Вера Иванова Нужавлак, Кугу Немдыж, Яндыган, Нольвож, Кугу Кугланур, Изи Кугланур, Мушинцы, Руш Кугланур, Отар, Аппаково яллаште, Йошкарэҥер селаште да моло илемыште илыше 1000 утла калыкым обслуживатлат. Мыйын мийымемлан Снежана Борисовна паша дене каен ыле.  

– Коктын улына гынат, паша эр гыч кас марте сита. Но у ФАП-ыш куснымо дене пуйто изиш куштылгырак, эсогыл веселарак лийын, вет тыште чылажат яндар, чылажат волгыдо, чылажат йытыра, икманаш, шӱм-чоным куандарыше, кумылым вӱчкышӧ, – куанен каласкала медсестра Вера Михайловна. – Калыкланат моткоч келша. Приёмыш ма вес амал дене толыт да, ой, могай сай манын, чарныде ойлат.

Кумданрак — «Марий Эл» газетын
2017 ий 12 декабрьыште лекше номерыштыже лудын кертыда.

 

Маргарита ИВАНОВА.
Авторын фотожо.

Опубликовать в Мой Мир
Опубликовать в Одноклассники

Добавить комментарий