КУЛЬТУР ДА ИСКУССТВО

Марла тора Японийыштат возеныт

6 декабрьыште Марий кугыжаныш университетыште «Марла чын возена» диктантым визымше гана сереныт. Тиде мероприятий Марий тиште кечылан пӧлеклалтын. Тудым МарГУ ден Марий тӱвыра рӱдер эртареныт. 
Диктантым возышо-влаклан Марий Эл Правительстве Председательын икымше алмаштышыже М.Васютин, МарГУ-н ректоржо М.Швецов, МарНИИЯЛИ-н директоржо Е.Кузьмин салам мутым ойленыт. Тора кундем гыч видеойӧн полшымо дене япон ученый Танака Такаси самламлымашым колтен. Японийыштат тудын студентше-влак марий диктантым возеныт.
Тений диктант Экологий идалыклан пӧлеклалтын да «Шупашкар вӱдаралтыш» маналтын. Марла чын возен моштымым тӱрлӧ ийготан-шамыч тергеныт. Нунын коклаште республикын тӱвыра, печать да калык-влакын пашашт шотышто министрын алмаштышыже Г.Ширяева, МарНИИЯЛИ-н директоржо Е.Кузьмин, Мер Каҥаш председательын икымше алмаштышыже В.Мочаев лийыныт. Валерий Александрович Данила уныкажымат конден.
— Тений марий диктантым икымше гана серем. Данила уныкамат пырля налынам. Шым уныка коклаште кок уныкам марла мутланат. Пырля илена, садлан марла пелештена. Ачашт руш улеш, аваже пеле руш, пеле марий. Йочам чаманыман огыл. Нунын дене могай йылме дене кутырет, тугай йылме деке тунемыт. А диктантым возаш Данила келшен, но нелылык шижалтын, мӧҥгышто тидым ик ганат ыштен огынал.Туге гынат кумылна волен огыл, — каласыш мыланна Валерий Александрович.
Марий диктантым Йошкар-Олаште веле огыл, районлаште, марий-влакын тӱшкан илыме кундемлаште, Башкортостан ден Татарстан республикласе районлаште, Казаньыште, Санкт-Петербургышто сереныт. «Марий Эл» газет редакцийын пашаеҥже-шамычат ты акцийыш ушненыт. Тений диктантым 1000 утла еҥ возен.

Л.ШАБДАРОВА.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *