ТАЗАЛЫК УВЕР ЙОГЫН

Черланыше-влак кечын ешаралтыт

«Кодшо арнян республикыштына ОРВИ дене черланыме 2795 случайым регистрироватлыме. Тиде показатель эпидемий лондем деч 20,1 процентлан ӱлнӧ. Грипп дене черланыше уке. ОРВИ дене черланымылан кӧра 91 еҥым эмлымверыш пыштыме, тиде чот гыч 72,5 процентше 14 ияш марте йоча-шамыч улыт» – увертара Роспотребнадзорын Марий Элысе пӧлкаже. 

А ынде йырым-йырда тӱткынрак ончалза: чыланак таза улына мо? Але чӱчкыдын тӱрвынчын, нолым нӱшталын, кӧргӧ лектын вочшашла кокырен, шинчавӱдым йоктарен коштшыжо кугурак чотыш погынена? Тиде сӱрет ОРВИ дене орланыше-влакын регионысо Роспотребнадзорын палемдыме чотшо деч палынак шуко улмо нерген ойла. Тыгодымак вес йодыш лектеш: черланыше еҥже шкенжым огеш пагале але пашам пырля ыштыше йолташыже-шамычым огеш чамане да калык коклаште коштеш мо? Эше ик гана ушештарыме шуэш: чер мыскарам, айда-йӧра койышым огеш чыте! Окса, шинчымаш нигунамат огыт сите, сандене шке тазалыкым эскерыза, лишыл еҥда-влакым черландарыме деч аралыза. Айдемын эн кугу поянлыкше – тазалык.

ОРВИ умбакыже ынже шарле, эшеат шуко еҥым ынже авалте манын, Оршанке, Звенигово районласе да Волжск оласе йочасадлаште кандаш группышто туныктымо да воспитатлыме пашам чарен шогалтыме. Тиде чотат эркын-эркын кушкын толаш тӱҥалеш. Амалжым умылтараш огеш кӱл, шонем.

Регионыштына грипп дечын прививкым ыштыме кампаний умбакыже шуйна. Федеральный бюджет кӱшеш «Совигрипп» вакциным 194 000 кугыеҥ ден 81 497 йочалан ыштыме. 3000 утла еҥ прививкылан оксам тӱлен. Вакцинацийым чылаже 278 786 еҥ эртен, тидыже республикыште илыше чумыр калык гыч 40,7 процент лиеш. Пытартыш жапыште вакцинын пайдалыкше да ситыдымашыже шотышто кокыте шонымаш кумдан шарлен. Тыште ик вашмут гына: грипп ма вес чер деч прививкым ышташ але уке – пациентын праваже.

М.ИВАНОВА.

 

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *