СОЦИАЛЬНЫЙ ИЛЫШ ТАЗАЛЫК

Психологын каҥашыже: Ойгыш логалшым шкет ида кодо

Россий МЧС-ын Марий Элысе тӱҥ виктемжын старший психологшо Татьяна Исаеван мутшо почеш, 16 ноябрьыште Козьмодемьянск кугорнышто шучко аварийыш логалше-влакын родо-тукымышт дене 13 психолог пашам ыштен… 

Тиде виктемын кум специалистше деч посна эше Экстренный психологический полышым пуымо рӱдерын Юл кундемысе филиалже гыч  вич да РСЧС-ын республикысе системыж гыч тынарак психолог эмганыше-влакым кондымо эмлымверлаште, ӱмыр лугыч лийше-влакын капыштым вераҥдыме Судмедэкспертизе бюрошто лийыныт.

– Трагедийым кажне еҥ шке семынже чыта. Но ончыч чылам гаяк шок, ӧрткымаш авалтат, айдеме кугу азап лиймылан огеш ӱшане. Южышт мӱгырен шортын, эсогыл уш кайыме гай кычкырен, ажгынен кертыт, кумыл волен, илыш ямым йомдарышат улыт. Чыла тиде нормылан шотлалтеш, сандене тыгай годым кумыл толкынлан тӱжваке лекташ чаракым ышташ огеш кӱл. Вара айдеме чот ойгыраш тӱҥалеш, тидыже 6-7 арня шуйна. Неле жапыште ойгыш логалше еҥлан лишыл айдемыжын уке лиймыжым умылаш кӱлешан. Илыш гыч кайыше еҥ ончылно титакым шижше, шкет кодаш тыршыше-шамычат шагалын огытыл. Нунын пелен чоным почаш йӧным ыштыше, кӱлмӧ годым полшен кертше еҥ лиеш гын, сай ыле, – манеш Т.Исаева.

Специалист-шамыч «шокшо линий» телефонланат вашештеныт. Тушкыжо 142 гана йыҥгыртеныт, тӱҥ шотышто – корно азапыш логалше-влакын родо-тукымышт, палымышт. Южо еҥ шке полышыжым темлен, вӱрымат пуаш ямде лийын.

М.ИВАНОВА.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *