СОЦИАЛЬНЫЙ ИЛЫШ ТАЗАЛЫК

Медицине: Мом темлат, мо деч шӧрлат – жап ончыкта

Общероссийский калык фронтын Марий Элысе пӧлкажын площадкыштыже «Социальный чынлык» пашаче группын Йошкар-Оласе йоча эмлымверын гастроэнтерологический профилян кечывал стационаржым Изи Какшан серыште верланыше 3-шо №-ан йоча поликлиникыш кусарыме йодыш шотышто заседанийже эртен. Тушто исполнительный кучемын, ОНФ-ын еҥже, эксперт, гастропатологиян йоча-влакын ача-авашт, коча-ковашт, гастроэнтерологический профилян кечывал стационарын пашаеҥже, журналист-влак лийыныт. 

Рӱдоласе ача-ава, коча-кова-влак Волков уремыште верланыше кечывал стационарым 2018 ий 1 январь гыч 3-шо №-ан поликлиникыш кусарыме ваштареш улыт да тидын шумлык кок тӱжем утла подписьым погеныт. Нунын палемдымышт почеш, 3-шо №-ан поликлинике олан йӧндымӧ, мардежан кундемыштыже верлана, тушко тӱшка транспортат начарын коштеш. Стационарым поликлиникыш кусарымылан кӧра кызытсе отделенийын пашаеҥ-влак штатше пелылан наре утыктаралтеш. У верыште туврашын кӱкшытшӧ, коридорын лопкытшо СанПиН-лан келшен огыт тол, черле-влаклан эрдене да кечывалым диетический кочкышым огыт пукшо, койко чотат пелылан наре шагалемеш, медицине тӧнежыште ямде анализ деч посна эмлалташ огеш лий…
«Отделенийым 3-шо №-ан поликлиникыш кусарыме ик эн тӱҥ амал черле йоча-шамычлан кӱкшӧ квалификациян медицине полышым лишемдыме дене кылдалтын, вет у верым чын диагнозым шындаш полшышо экспортлан ямдылыме у оборудований-влак дене шыҥдарыме. 15 койкан стационар кандаш шагат эр гыч куд шагат кас марте кок смене дене пашам ышташ, кечыште 30 йочам эмлаш тӱҥалеш. Тыгеже шинчымашым икымше сменыште погышо йоча стационарын кокымшо сменыштыже эмлалтын кертеш, кокымшо сменыште тунемше – икымшыште. Инфекциян шучко черым пуртымо деч стационарыш СанПиН-ын йодмо ямде анализше-влак дене гына налыт. А УЗИ, гастроскопий гай шымлымаш-влак эмлалтме жапыште эртаралтыт. У верыште пациент-влакым стационарысе семын икте огыл, а икмыняр, эн шагалже ныл, врач курироватла. Тылеч посна йоча ден ача-ава-влаклан диетологий школ пашам ышташ тӱҥалеш. Икшыве-шамыч галокамерыш, физиопроцедурыш, массажыш коштын кертыт. Черле-влакым пукшаш вер да йӧн улыт, кӱлешак гын, тиде пашам ворандарен колташ лиеш.Кызытсе стационарын ик пашаеҥжат огеш утыктаралт, у верыш кусныдымо кажне персоналлан вес пашам мумо да темлыме. Гастроэнтерологический профилян кечывал стационар 3-шо №-ан поликлиникыш кусна гын, онкологий отделенийым кумдаҥдаш йӧн лектеш», – ача-ава-влакын нимучашдыме йодышыштлан Йошкар-Оласе йоча эмлымверын тӱҥ врачшын пашажым шуктышо Юлиана Зейтулаева тыматлын вашештыш.

Тудын ойжым тазалыкым аралыме министр Марина Паньковат пеҥгыдемдыш.

Заседаний кок шагат утла шуйныш, стационарым кусарыме йодышым уэш-пачаш лончылышт гынат, ача-ава, коча-кова-влак шке шонымашышт, йодмашышт деч ышт шӧрлӧ.

– Йошкар-Олаште илыше-влакын гастроэнтерологический профилян кечывал стационарым кызытсе верешак кодаш темлыме йодышым рашемдыме шотышто Общероссийский калык фронт вашла мутланыме площадке семын ыле. Кок шагат каҥашыме, эсогыл ӱчашыме деч вара ача-ава, коча-кова-влак Тазалыкым аралыме министерствын пашаеҥже-шамыч дене ик ойыш ышда шу. Чыла тидым шотыш налын, мыланна регионысо Росздравнадзор вуйлатыше Владимир Юрьевич Гладнев деч полышым йодаш логалеш. Нигӧ дене кылдалтдыме эксперт-влак ик тылзе жапыште кызытсе кечывал стационарын пашажым да 3-шо №-ан поликлинике негызеш ямдылыме у тӧнежын сай ден удажым тергат. Стационар верешыжак кодеш але 3-шо №-ан поликлиникыш кусна – жап ончыкта. Тидым ик тылзе гыч пален налына, – заседанийым мучашлыш регионысо ОНФ-ын «Социальный чынлык» пашаче группыжым вуйлатыше Ольга Цветкова.

Тиде вашлиймашым иктешлыме семын ОНФ-ын чолга еҥже-влак регионысо Транспорт да корно озанлык министерствыш пациент-влаклан 3-шо №-ан поликлиникыш кошташ йӧнан транспорт схемым ышташ темлыме йодыш дене лекташ палемденыт.

М.ИВАНОВА.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *