УВЕР ЙОГЫН

Тӱвыра увер: Йӱланам аралымаште надырже кугу

Марий кугыжаныш университетын мурышо да куштышо «Марий мурсем» ансамбльже 15 ияш лӱмгечыжым чапле концерт дене пайремлыш. 

Шке жапыште университетыштыжат («Рия-рия»), пединститутыштыжат («Марий сем») студент-влакын мурышо да куштышо коллективышт лийыныт. А кок вузым иктыш ушымо деч вара, лучко ий ончыч, «Марий мурсем» ансамбль шочын. Тудым Марий Эл Республикысе культурын сулло пашаеҥже Р.Алексеев вуйлаташ тӱҥалын. Тылеч вара творческий коллектив мастарлыкшым кумда элнан ятыр кундемыштыже ончыктен, калык коклаште пагалымашым сулен налын.

Ансамбльым лӱмгече дене саламлаш университетын ректоржо М.Швецов, Марий Эл Республикын тӱвыра, печать да калык-влакын пашашт шотышто министржын икымше алмаштышыже В.Актанаев, Кугыжаныш Погын председательын алмаштышыже А.Ивановын полышкалышыже А.Петров, тыгак коллективын ончычсо вуйлатышыже, участникше, фольклор коллектив-влак толыныт. Ансамбль лӱмеш ятыр поро мут йоҥгалте, грамотым, пӧлекым кучыктышт. Но эн шерге пӧлек семын университетын ректоржо М.Швецовын ансамбльлан у костюмым ургаш оксам ойырымыжым палемдыман.

В.Смоленцев.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *