ПРАВОСЛАВИЙ

Епархий молан шелалтын?

Волжскысо Свято-Никольский кафедральный соборышто Волжск да Шернур епископ Феофан угыч ыштыме кафедрыште икымше службым эртарен. Ончыгече Йошкар-Олан да Марий Элын митрополитше Иоанн дене пырля тудо журналист-влаклан икымше пресс-конференцийым эртареныт. 

Руш православный черкын Синодшын указше дене келшышышын, у кафедр тений 6 октябрьыште ышталтын. «Молан вара Йошкар-Ола да Марий епархийым шелыныт?» — вигак йодыш лектеш. Йошкар-Олан да Марий Элын   мирополитше Иоаннын ойлымыжо почеш, епископ декат юмылан ӱшаныше кажне еҥ миен, каҥашым налын кертшаш. Эшежым Марий Элыште тӱрлӧ национальностьян да конфессиян еҥ-влакын илымыштат тидлан амалым ыштен.  Волжск епархий Волжск олам, Волжский, Кужэҥер, Марий Турек, Морко, У Торъял, Параньга, Шернур районлам авалта. Епископатын виктемже Свято- Никольский собор пелен ышталтшаш.  У епископ лишыл жапыште епархийжын чыла приходшым ончал савырнаш да палыме лияш палемден. Йӧн лийме семын марий йылмымат тунемаш тӱҥалаш сӧрен. Вет мемнан республикысе ятыр приходышто службым марлат эртараш тӱҥалыныт. Митрополит Иоаннат черке  пашаште марий йылмым сайын палымылан кугу верым ойыра. Кусарыше комиссийын тыршымыж дене православий шӱлышан шагал огыл книга, брошюр, газет  савыкталтыт.

Епископ Феофан шкеже Рязань кундем гыч. Тыглай пашазе ешыште шочын-кушкын. Рязаньысе духовный семинарийыш тунемаш каяш кумылым ончыктымыжлан ачад ден аваже тореш лийын огытыл. А семинарий деч вара тудо монах лийын, ончыч Свтяо-Троицкий, вара Никола-Черниговский монастырьлаште  служитлен. Икымше гана Йошкар-Олаш толмекыже, тудым мемнан олаште шуко мотор черке улмо ӧрыктарен да куандарен. Епископ Феофанын митрополит Иоанн семынак моткоч поро кумылан, ласкан мутланыше, ушан-шотан еҥ улмыжо шижалте.

Кодшо рушарнян, Иоанн Златоустым шарныме кечын, нуно коктын Йошкар-Оласе Благовещенский соборышто иквереш литургийым эртареныт.

С.Носова

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *