КУЛЬТУР ДА ИСКУССТВО

Искусство: Какшан ӱмбалне кӱсле веле огыл йоҥген

18 — 19 ноябрьыште Национальный президент сымыктыш школышто «Самырык-влакын усталык шонанпылышт — Йоҥгалт, кӱсле, Какшан ӱмбалне» тӱнямбал фестиваль-конкурс эртен. 

Тушко Марий Элысе веле огыл, Моско, Чебоксар, Саратов, Минск, Петрозаводск олала, Бурятий республик гыч кӱслезе-влак ушненыт. Пайремым торжественно почмаште тӱвыра, печать да калык-влакын пашашт шотышто министрын алмаштышыже Александр Луничкин лийын.

— Кӱслем марий калык яндарлыкын, пашам йӧратыме, ӱшаным ончыктышо символжылан шотла. Лач марий кӱсле шке йырже ятыр олам, кундемым иквереш ушен, — палемден Александр Николаевич. — Мемнан кугешнаш йӧршӧ кӱслезына-влакат шагалын огытыл. Иктыже — Тойдемар. Тудо концерт бригадыж дене Кугу Отечественный сарыште сеҥымашым лишемдаш полшен. Тыгак чапланыше педагог Тамара Андреевна Ягельдинам палемдаш лиеш. Тудо республикыштына кӱсле искусствылан негызым пыштен. Тачысе педагог-влакат Елизавета Ивановна Васютина, Фаина Викторовна Эшмякова самырык тукымым кӱсле искусствылан шӱмаҥдыме шотышто кугу пашам шуктен шогат.

Российысе музык академийлан, поснак Дмитрий Валерьевич Волковлан кӧра, марий кӱсле Гнесинмыт лӱмеш академий кӱкшытыштӧ йоҥга. Тиде — пырля келшен ыштыме пашана. Тидын дене кугешнашат уто огыл!

Конкурсышто чылаже 30 наре солист, 20 ансамбль мастарлыкым ончыктен. Участник-влак репертуарышт гыч кок произведенийым шоктеныт, семӱзгарын чатка семже гоч шке кундемысе тӱвыра, йӱла ойыртемым почын пуаш тыршеныт. Кок кече жапыште кӱсле семынак чапланыше тӱрлӧ калыкын семӱзгаржым кучен веле огыл, шоктен ончашат йӧн лийын. Марий, руш, татар кӱсле, бандура, цимбал, ятага, иочин да молат — кажныже ойыртемалтше йӱкым луктеш.

 

 

Кумданрак — «Марий Эл» газетын
2017 ий 25 ноябрьыште лекше номерыштыже лудын кертыда

А.Байкова.
М.Скобелевын фотожо.   

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *