СОЦИАЛЬНЫЙ ИЛЫШ ЯЛ ИЛЫШ

Журналистын шинчаж дене: Пашаче калыклан паша уке гаяк

Волжский районысо Сотнур ял шотан илем администрацийыш Курмызак, Куршамбал, Нурмучаш Шайра, Курыклӱвал Шайра, Полатсола, Шемъер, Шайрамбал, Руш Шайра, Кӱсола, Азъял кутыр, Порашпиляк, Памашэҥер ял-влак да Сотнур села пурат. Жапше годым утларак ялжым «Шайра кундем» тӱшка паян озанлык ушен, вет пӧръеҥ-влак кокла гыч шукынжо гаражыште пашам ыштеныт, ӱдырамаш-шамыч кокла гыч ятырынже – фермыште але шала пашам шуктышо бригадыште. Тӱшка озанлыкыште паша чылалан, эсогыл каникулышто улшо йоча-влаклан ситен. Тунам икте-весым кугыеҥ веле огыл, икшыве-шамычат паленыт. Кызыт… 

Кызыт сӱрет палынак весемын. Колхоз шукертак пытен. Тудым Сотнур селаште ушкалым ончышо Валерий Андреевын, Шайрамбалне тӱкан шолдыра вольыкым ашныше Эдита Петрован, карп колым шукемдыше Евгений Петровын гай кресаньык-фермер озанлык-влак алмаштен кертын огытыл да огытат керт. Руш Шайра ялыште пилорамым кучышо, пурам ямдылыше Владимир Харитоноват жапын-жапын икмыняр пӧръеҥлан гына пашам муын кертеш. Курыклӱвал Шайраште шочын-кушшо, Сотнур селаште «Домстрой» ООО-м вуйлатыше Эдуард Максимовын пашаеҥ-влакым кучымо штатше нергенат тидымак ойлаш лиеш. Кызыт кугурак организаций кокла гыч школ, эмлымвер, йочасад, ЖКХ участке, амалкалче Е.Окашеван ургымо цехше гына пашам ыштат. Зинаида Логинован вуйлатыме «Заря» СХПК-же тений чыла кушкылым пырчылан веле ӱден. Тиде озанлыкыште шошо-шыже, уржа-сорла тургым жапыште икмыняр еҥ тырша. Почтышто, аптекыште, тӱвыра пӧртлаште, кевытлаште да тыгайрак сынан моло верлаште кандаше деч шуко пашаеҥым огыт кучо. Тыгодым палемдыде огеш лий: Сотнур кундемыште 2500 утла еҥ ила.

Яллашке пуреден коштмо деч вара тыгайрак сӱрет шочо: кугезе коча-кована-влакын илемышт пытен толеш, курал-ӱдымӧ нурыштышт шӱкшудо, куэр, пӱнчер кушкыт, пашадыме еҥ официально пашам ыштыше деч  шукырак. Пытартышыже шотышто поснак пӧръеҥ-влак нелылыкыш логалыныт. Ятырынже, ешыштым, озанлыкыштым жаплан коден, пошкудо Татарстан Республикышке але Москвашке пашам ышташ коштыт. Кажне ялыште пакчам куралын, йыраҥым урен, вожсаскам луктын, шудым, олымым, комбикормам, пум да молымат конден кертше трактор уло гынат, калык ончычсо семын шуко вольыкым ок ашне. Мутлан Курыклӱвал Шайраште ик ушкалат уке! Южышт эсогыл сад-пакчам тичмашнек кучаш ӧрканат. Тыгодымак емыж-саска да пакчасаска дене оксам ыштен налше-влакат улыт. Спирт негызан тӱрлӧ средствым йӱшӧ-шамыч кечын гаяк ешаралтыт. Ял калык ончылан шукертак пӱсӧ йодыш туран шогалын: илаш але пыташ? Кӧн рӱдыжӧ уке гын, конешне, шуко ок шоно: тайыл почеш вола да вола, пеленже молымат шупшеш. Но сайын илаш шонышо, волгыдо ончыкылыклан ӱшаныше-влакат эше шукын улыт. Шке кундемыште оксам ыштен налаш йӧн уке гын, Волжскысо торгово-холодильный обрудованийым ямдылыше «Совиталпродмаш» заводыш, Зеленодольскысо судным чоҥышо А.М.Горький лӱмеш, ты олаштак верланыше фанерым ыштыше заводлаш, Приволжский посёлкысо поролоным ямдылыше «В+2» компанийыш кудалыштыт.

Кумданрак — «Марий Эл» газетын
2017 ий 18 ноябрьыште лекше номерыштыже лудын кертыда.

М.ИВАНОВА.

Опубликовать в Мой Мир
Опубликовать в Одноклассники

Добавить комментарий