ТАЗАЛЫК

Пӱсӧ йодыш: Кечывал стационарым кусарат

Йошкар-Оласе йоча эмлымверын гастроэнтерологический профилян кечывал стационарыштыже жапын-жапын эмлалтше пациент-влакын ача-авашт интернетыште пеш кугу тумам нӧлталыныт. Нунын мутышт почеш, тиде стационарым лишыл жапыште пуйто йӧршын петырынешт. Тидын шумлык оласе калык Марий Элым вуйлатыше А.Евстифеевлан эсогыл обращенийым ямдылен. 

Йошкар-Оласе йоча эмлымверын тӱҥ врачшым алмаштыше Ю. Зейтулаеван умылтарымыж почеш, Волков уремысе йоча эмлымверын гастроэнтерологический профилян кечывал стационарже Эшкинин уремысе 3-шо №-ан у поликлиникыш черле икшыве-влаклан эшеат кумдан полшымо шонымаш дене кусаралтеш. Пытартыш жапыште нӧргӧ пациент-шамычын пагар-шолора корно дене кылдалтше тӱрлӧ черышт йоча патологийыште ик эн ончыл верым налмым чарненыт да амбулаторно-поликлинический условийыште сайын эмлалтыт. Палемдыме кечывал стационарыште эмлалтше 70 процент наре пациентын черже хронический огыл, ситыдымаш-влак тӱҥ шотышто организмын функциональный пашаже пужлымо дене кылдалтыныт.  Тыгай состоянийым амбулаторийыштат диагностироватлаш да тӧрлаташ лиеш. У поликлиникын базышкыже кусарыме кечывал стационарыште пациент-влак эмлалтме жапым аныклен кертыт, а тидыже школышто тунемше ӱдыр-рвезе-влаклан поснак йӧнан лийшаш.

– Гастроэнтерологический профилян кечывал стационарым 3-шо №-ан у поликлиникыш кусарыме дене Йошкар-Олаште илыше йоча-влакым эмлаш йӧн утларак да сайрак лиеш. Пагар-шолора корно чер дене орланыше икшыве-шамыч  тӱҥ шотышто амбулаторно-поликлинический полышым налыт, тыгодым неврологын, ЛОР-врачын да моло специалистын консультацийыштат моткоч кӱлешан. Шуко профилян у поликлиникысе кечывал стационарыште кызытсе жаплан келшыше оборудованиян эндоскопический, физиотерапевтический, УЗИ-кабинет-влак улыт – черлылан специализироватлыме полышым налме шотышто тургыжланышаш уке. Икшывылан экстренный полыш кӱлеш гын, тудым Республикысе йоча эмлымверын стационарышкыже колтат, – манеш Марий Эл Республикын Тазалыкым аралыме министерствыжын ава ден йочам аралыме пӧлкажым вуйлатыше Н.Фролова.

Эмлымверын кечывал стационаржым поликлиникыш кусарыме дене медицине персонал-влак кокла гыч иктат паша гыч огеш утыктаралт.

Кумданрак — «Марий Эл» газетын
2017 ий 18 ноябрьыште лекше номерыштыже лудын кертыда.

М.ИВАНОВА.    

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *