ЕШ ИЛЫШ СПОРТ

Таза еш – таза эл: Черланымылан кєра – кугу спортыш

Таза илыш-йӱлам кучымо шотышто сай пример семын Медведево районысо Арбан ял гыч Зуевмыт ешым палемдыман. Шукерте огыл газетыштына суртоза Михаил Иванович нерген лишкырак каласкаленна ыле.  Таче тиде еш гыч Виктория ден Алексейын таза илыш-йӱла дене таҥлалтмыштым пален налыда.  

В.Зуеван кугу спортыш корныжо тазалыкым пеҥгыдемдаш шонымаш  гыч тӱҥалын. «Изием годым пеш чӱчкыдын черланенам. Сандене ачам пеленже куржталыкташ тӱҥалын. Чынак, чер ӧрдыжкӧ кораҥын, а спортым ӱмырешлан, манаш лиеш, йӧратен шынденам», – ойла ик интервьюштыжо Виктория. 

Эркын-эркын, куржталаш тӱҥалын, Вика таҥасымашлаштат  вийжым терген. Результат путырак куандарыше лийын. Варажым Чебоксарыште кугыжаныш педагогический университетын физический культур факультетыштыже шинчымашым келгемден. Мутат уке, туштат куштылго атлетике дене пеҥгыде кылым кучен. Поснак марафонышто ойыртемалтын, сай результатым ончыктен. Тидым шотыш налын, Викториям командышке налыныт. Команде дене йот эллашке коштын. Икымше мӱндыр стартше 2002 ийыште Ирландийыште лийын. Икымше гана тӱнямбал чемпионатыште кроссышто вийым тергаш моткоч лӱдыкшӧ улмаш. Шке тӱшкаштак 250 еҥ лийын. Варажым Виктория чылажланат тунем шуын. Икмыняр старт Америкыште, Европышто… Таҥасымаш деч ончыч ӱдыр спортсмен да тренерже-влак денат вашлияш тыршен огыл, соперникше-шамыч денат кутырымаш деч кораҥын. Тӱҥ шотышто тудо шоссеште куржталаш йӧратен.

2006 ий 15 октябрьыште Российын чемпионатыштыже кокымшо лийын. Тылеч вара Вашингтоныш кудалшаш улмаш, но… Кок арня температур кучалтмылан кӧра билетым пӧртылташыже логалын.

Российын кокымшо командыштыже икмыняр ий сай результат дене ойыртемалтын. Российын кум гана чемпионжо 2008 ийыште кугу спорт гыч кораҥын. Таче кечылан куштылго атлетике дене Российын спорт мастерже Виктория тренер сомылым шукта. Жапше годым Олимпиадыштат вийым тергаш шонымашыже лийын, но… Тиде шонымаш илышыш шыҥдаралтын шуын огыл. «Варажым шканем шке ӱшанымым чарненам ыле ала-мо…», – манеш самырык ава.

 

Кумданрак — «Марий Эл» газетын
2017 ий 18 ноябрьыште лекше номерыштыже лудын кертыда. 

Е. Эшкинина.

Опубликовать в Мой Мир
Опубликовать в Одноклассники

Добавить комментарий