УВЕР ЙОГЫН

Судьялан шке шонымашыжым темлен

Йошкар-Олан ончычсо мэрже Павел Плотниковын делаже шотышто черетан колыштмаш-влак 2, 3 ноябрьыште эртеныт. 

Пытартыш кок заседанийыште 6 у свидетель показанийым пуэн. Але марте ты дела шотышто 40 утла свидетель ойлен.

2 ноябрьысе колыштмашке кок свидетель толын. Иктыже Йошкар-Олаште налог инспекцийын тӱҥ специалист-экспертше Мария Новосёлова лийын. Тудын улмыж годым республикын прокуратуржын пашаеҥже-влак юридический лица, «РУК» ден «Столица-Строй» компаний-влакым регистрироватлыме дене кылдалтше икмыняр лу налог документым шымленыт.

Но кум шагат шуйнышо заседанийыште утларак жапшым Ирина Бояринцевам йодыштмаш налын. 2007 ий гыч тудо «РУК» ООО-што тӱҥ бухгалтерлан пашам ышта. 2012 ий декабрь гыч 2015 ий март марте «Столица-Строй» компанийыште бухгалтер пашам шуктен. Икымше компанийжын учредительже Александр Туруев ден Виктор Соловьев лийыныт. Но вуйлатен  Туруев. Бояринцеван ойлымыж почеш, Соловьевын пашам ыштымыж жапыште ӱдырамаш тудым ик гана веле ужын. Компанийын учредительже-влак тиде организацийын парышыж гыч дивидентым налыныт. Тӱҥалтыште тудо изи лийын гын, 2009 ий гыч кушкын. Свидетельницын ойлымыж почеш, Соловьевын оксажым чынже дене Павел Плотников наледен. Тидын нерген Туруев ойлен манын палемден.

Бояринцеван пуымо письменный показанийлаштыже кок компанийын пашашкыжат Плотниковмыт ешын ушнымыж нерген тудо шижын. Но тиде шижмашыже мо дене пеҥгыдемдалтеш – судлан умылтарен огыл. Тиде –шонымашыже веле манын палемден. Тудын деч ончыч ойлышо икмыняр свидетель семынак. Ирина Бояринцева палемден: показанийым пуымыжым следователь-влакын кузе возымыштым тудо лудын огыл. Тидыжым ӱдырамаш але марте суд процессыште нигунам лийдымыж дене умылтарен.

Умбакыже «Столица-Строй» компаний нерген мутланеныт. Тудын пашаже шонымо семынак сайын воранен огыл. Шуко пачеран улыжат кок пӧртым чоҥеныт. Тӱрлӧ ситыдымаш улмылан кӧра комиссий тудым кужу жап приниматлен огыл. Кумшо пӧрт денат нелылык лектын – тудым нӧлташ разрешенийым пуэн огытыл.

Тиде колыштмаштак Бояринцева Оксана Плотникова дене ончычсо мэрын пелашыжын машинаштыже мутланыме нерген ушештарен:

– Мутланымаште свидетель лийын огыл. Оксана «мутланаш кӱлеш» манын ойлыш. Мый машинашкыже шинчым. Тудо мыйым Йошкар-Ола администрацийын кудывечышкыже наҥгайыш. Павел Вячеславович (Плотников) лекте. Туруев семынак мыйымат шындат манын каласыш. Но мый совестем ару, маньым. Плотников каласыш: «Ме тылат ӱшанена, но садак тыйым шындат». Пашашке толмеке, Александр Анатольевичлан (Туруевлан) тидын нерген каласышым. Тудо темлыш: «Кӱлешлан шотлет гын, паша гыч кай». Но мылам паша кӱлын, сандене шым кай.

Свидетельын мутшо почеш, тиде мутланымашын могай амал дене лиймыжым тудо умылыдеак кодын. Но тиде «Столица-Строй» ООО-н кумшо пӧртым чоҥаш разрешенийже уке улмо лийын кертын. Дольщик-влакын оксаштым «Туруев деч» манын, компаний займ ойпидыш почеш приниматлен. Чоҥымо деч вара тиде оксам «переоформитленыт». Ойлымыж почеш, тиде йодыш шотышто мошенничестве нерген прокуратурыш йодмаш-влак пуреныт. Мутлан, Дмитрий Мирошин деч. 2015 ий март гыч тудо «Столица-Строй» ООО-н директоржо лийын. Тыгак Павел Плотников деч. Прокуратур тергымашым эртарен, но чоҥышо компанийын пашаштыже преступленийым муын огыл. Ола администрацийыште мутланыме деч вара, ӱдырамашын ойлымыж почеш, «Столица-Строй» компанийын офисыштыже Оксана Плотникова коймым чарнен.

2015 ийыште лийше икымше допросышто (обвинений представитель-влак пуымо ныл письменный показанийжымат лудыныт) следователь-влаклан Бояринцева «Столица-Строй» компанийын илыме пӧрт-влакым чоҥымо мланде участке-влаклан аренде оксам тӱлыдымӧ нерген каласкален. Кунам Александр Туруевлан парымым петыраш кӱлмӧ нерген ойлен, тудо вашештен: «Плотников кызытеш тӱлаш огыл разрешенийым пуэн. Кунам каласа, тунам тӱлена». Тиде кок предложений шотыштак ончычсо мэрын адвокатшын йодышыжо лектын: «Туруев Плотниковын фамилийжым ойлен мо?»

– Тудо ойлен: «Изишак вучалте. Кызытеш тӱлаш огына тӱҥал». Плотников нерген фамилий дене ме йӧршынат кутырен огынал. Предварительный следствий жапыште серыме протоколлаште южо вереже туге возымо – ялтак ала-могай сочинений, – вараже тидым судьянат рашрак умылтараш йодмыжлан каласен Бояринцева.

Умбакыже свидетельнице кугыжаныш обвиненийын Волков уремыште верланыше пачер-влак, воктене улшо гараж, тудым чоҥаш мланде участкым тудын лӱмеш возыктымо, вара налме-ужалыме договор почеш Оксана Плотникован аважлан, Надежда Пашковалан, пуымо дене кылдалтше йодышыж-влаклан вашештен. Бояринцева палемден: ойпидыш почеш, ик пачерын акше 4 миллион теҥге лийын.  

Тиде кечынак умбакыже шуйнышаш заседанийыш ӱжмӧ кум свидетель гыч иктыжат миен огыл. Санденак вес колыштмаш 3 ноябрьыште лийын.

Ты заседанийыш Марий Элын кугыжаныш пого министрын ончычсо алмаштышыже Виктор Мусиным ӱжыныт. Павел Плотников годым тудо Йошкар-Оласе КУМИ-ште (комитет по управлению муниципальным имуществом – авт.) муниципал погым арендоватлыме отдел начальникын алмаштышыже лийын. Тудо обвиненийын предприниматель-влак дене аренде ойпидышым ыштыме ойыртем-влак нерген йодышыж-шамычлан вашештен. Прокуратур представитель-влак кажне тылзын тӱлымӧ окса кугыт кузе палемдалтмымат рашемдаш тыршеныт.

Тылеч вара Йошкар-Олан ончычсо тӱҥ архитекторжым, 2002-2006 ийлаште архитектур ден градостроительстве управленийым вуйлатыше Вениамин Мамуткиным, ӱжыныт. Тудо улшо архитектур кумдыкышто у оралте-влакым чоҥымо годым планировкым ыштыме ойыртем-влак нерген йодыш-шамычлан вашештен.

Нунын ойлымышт деч вара Павел Плотников судья деке тиде процессыште кажне гаяк свидетельын показанийже ден следствийын материаллаштыже келшен толдымаш палдырныме нерген каласен да молан тыге лиймын чын амалжым рашемдаш йодын:

– Кажне гана икте денак мучашлалтеш: обвинений свидетель-влакын показанийыштышт келшен толдымаш улмо нерген ойла. Предварительный шымлымаш годым свидетель-влак деч налме кид дене возымо показанийыштым кажне гана тӱрыс лудыт. А мучашлан нимомат умылаш огеш лий: кушко ме толын шуынна? Свидетельын позицийже могай – умылаш неле. Мый кандаш заседаний чытенам. Тидын шотышто шке шонымашем ойлен омыл. Но, мыйын шонымаште, суд тергымаш тудланак: уголовный делаште чыным муман. Келшен толдымаш уло гын, тугеже айста рашемдаш тыршена. Мыят, теат, ваша честь, прокурор-влак ден адвокатат – чыланат юрист улына. Тыште ойлышо-влак заседанийыш икымше гана толыныт. Нуно каласыме южо мутшын мом ончыктымыжымат огыт умыло.

Ончычсо мэр суд заседанийын протоколыштыжо обвиненийын мумо  келшен толдымаш шотышто свидетель-влакын позицийыштым ончыкташ темлен.

Л.Камалетдинова.

Опубликовать в Одноклассники

Добавить комментарий