КУЛЬТУР ДА ИСКУССТВО

Мемнан унана: Лӱмынак сонар ечым налын

Лаштыкнан тачысе унаже — «Марий памаш» фольклор да этнографий калык ансамбльын участникше Анатолий Иванов

Анатолий Медведево районысо Какшансолаште ила. Йошкар-Олаште ик организацийыште кӱш возышо сӱретчылан пашам ышта. Паша деч вара «Марий памаш» ансамбльыш коштеш. Ты коллективыште ынде 25 ий мастарлыкшым шуара. Ансамбль дене Марий Элын веле огыл, Российысе ятыр кундемыште лийын, тыгак Венгрийыш, Финляндийыш миен толашыже пиал шыргыжалын.

Анатолий кушташ изинекак йӧратен мо? Ты колективыш кузе ушнен? Нине да моло йодышлан шкеж деч вашмутым нална.

— Анатолий, ешыштыда иктаж-кӧ кушташ тале лийын мо? Кӧ деч тидлан тунемынат?

— Сенькан школышто тунемме годым Валентин Васильевич Архиповын вуйлатыме «Кӱдыроҥгыр» ансамбльже кугун полшен. Тушко икымше класс гычак кошташ тӱҥалынам. Эн ончыч совлам кыренам, а вара балалайке дене шоктенам, тӱрлӧ мурым мурымо, куштымашым шындыме. Акамат тиде ансамбльыш коштын, сандене тудым ончен, мыят коллективыш ушнаш шоненам.

— «Марий памаш» ансамбльыш кузе логалынат?

—  «Кӱдыроҥгыр» деч вара «Изи памаш» лийын. А тидыже — «Марий памашын» спутникше. Лач тиде жапыште Валентин Васильевич Архипов «Марий памашыште» аккомпаниаторлан ышташ тӱҥалын да мыйым тушко ӱжын. Коллектив сайын вашлийын да тачат икте-весе дене иза-шольо, ака-шӱжар семын келшена.

 — Куштен-куштен йол ярна докан. Тудым кузе кандарет?

— Изинекак спорт дене пеҥгыде кылым кучем, сандене йол нойымым але марте шижын омыл. Адакшым ме концертымат тынар шуко огына пу. Ончыч  Йошкар-Олашкат велосипед дене кудалыштынам. Пеш келшен. А кызыт автомашина дене кудалыштам, сандене иктаж концертыште куштымым йоллан тренировко семын шотлаш лиеш.

Кумданрак — «Марий Эл» газетын
2017 ий 18 ноябрьыште лекше номерыштыже лудын кертыда.

Алевтина Байкова мутланен.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *