ӰДЫРАМАШ КОРНО

Чолгалык: Суткаште молан 24 шагат веле гын?

Алевтина Анатольевна Стародубцева У Торъял кыдалаш школышто туныкта. Пӱтынь гаяк жапшым йӧратыме пашажлан пӧлекла гынат, чонжылан келшыше сомылым шукташат ярсашак тырша. А тудыжо тиде чолга, кожмак, кумылзак да тунамак моткочак тыматле ӱдырамашын ятыр. 

Шернур районысо Марисола школым тунем пытарымеке, 1989 ийыште ӱдыр Н.К.Крупская лӱмеш кугыжаныш педагогический институтышто математике да физике специальностьым налын. Тылеч вара эре икшыве-влак дене пашам ышта – нунылан математикым келгын туныкта. Пытартыш ийлаште гын тиде предмет денак шымлыме пашам тунемше-влак дене пырля эртарат. Тыршымышт арам огеш лий — тунемшыже-влак Ломоносов лудмашке, Юлтехын эртарыме шымлымаш проект, моло конкурслашкыже ушнат да кажне гана сеҥыше радамыш логалыт.

— Мемнан ачана, Анатолий Васильевич, моткочак виян математик лийын. Тидыже, очыни, тудын дечак мыламат куснен. Мый школышто математике дене эре визытанлан тунемынам. Санденак умбакыжат илышем ты специальность дене кылденам да ик ганат ӧкынен омыл. Тиде – мыйынак.

Алевтина Анатольевна математик гынат, 1999 ий гыч ешартыш кружок семын школ лесничестве дене пашам эртарен. 2000-ше ий гычак йоча-шамыч дене пырля тудын дене кылдалтше шымлыме пашам возаш тӱҥалыныт да эре ончыл верыш лектыныт. Тунемшыже-влак Россий кӱкшытан конкурслашкат коштыныт да сеҥымаш дене пӧртылыныт. Кажне кеҥежым республикысе район-влакын школ лесничествыштын слетышт эртен. Туштат эре ончыл верыш лектыныт.

— Тунам пелашда лесничийлан ыштен. Санденак, очыни, тиде пашам тыланда «кучыктен пуэныт»? А марийда тыланда полшен? – йодым.

— Лач тыгак лийын. Пелашем, Олег Петрович, тунам У Торъял лесхоз директор ыле, — каласкала А.А.Стародубцева. — Тидым паленак, ты пашам эртараш тӱҥалаш мылам темленыт. Марием кертмыж семын чыла шотыштат эре полшаш тыршен. Вараже Петя эргынат школ лесничестве паша дене эре пеленемак коштын да тудат тидлан шӱмаҥын. Шымлыме пашаж дене Москвашке самырык лесовод-влакын съездышкышкат миен. Вараже илышыжымат тиде паша денак кылдаш кумылжо лектын – Юлтехыште чодыра озанлык факультетым тунем пытарен. Кызыт 27 ияш веле гынат, Шернур лесничествын филиалжын директоржо.

 

Кумданрак — «Марий Эл» газетын
2017 ий 11 ноябрьыште лекше номерыштыже лудын кертыда.

Любовь Камалетдинова мутланен.
Фотом еш альбом гыч налме.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *