КУЛЬТУР ДА ИСКУССТВО

«Ший памаш» муро кумыланым уша

Калык усталык да культурканыш паша шотышто республикысе шанче-методик рӱдер 1999 ий годсек кок ийлан ик гана «Ший памаш»  фестиваль-конкурсым эртара. Тений тудо Йошкар-Олаште 23 гыч 25 ноябрь марте лиеш. 

Регион-влак кокласе  финн-угор эстраде муро фестиваль-конкурсын тенийсе ойыртемже могайрак? Участник-влак кушечын толыт? Нунын мастарлыкыштым могай номинацийыште аклат? Тиде да моло йодышлан вашмутым калык усталык рӱдерын методистше Роза Искакова деч налынна.

Роза, фестиваль-конкурслан рӱдер ятыр ий вуйын шога. Тений участник-влак кушеч толыт?

Фестиваль-конкурсыш тений ансамбль-влак шукынрак ушнат манаш лиеш.  Нуно Марий Эл гыч веле огыл, Удмуртий, Коми республикла гычат йодмашым пуэныт. Чылаже 13 коллектив ушна. Солист-влак, молгунамсе дене таҥастарымаште, ты гана шагалрак лийыт. Сценыш чылаже 14 еҥ лектеш.

— Фестиваль-конкурс у шӱдырым чӱкташ полша, маныт…

— Муро пайрем чынже денак у шӱдырым чӱкташ полша. Фестивальын  ончычсо участникше-влакат сценыш уэш лекташ кумылан улыт, нуно у кӱкшытыш шуаш шонат. Тиддеч посна у лӱм-влакат йоҥгалтыт.  22 ий жапыште «Ший памашыште» 150 утла солист да 35 наре мурышо ансамбль шке вийжым терген. Нунын кокла гыч марий эстрадын шӱдыржӧ-влак Влад Николаевым, Эльвира Поповам, Нина Казашовам, Светлана Львовам, Надежда Васкановам, Светлана Яндуковам, Надежда Пашкинам, Валерий Петровым, Эльвира Токташевам, Ирина Юшкинам, Дмитрий Атласкиным, Марина Почтеневам, Татьяна Кибаевам, Володя Матвеевым, Татьяна Соловьёвам, Станислав Устюговым, Артур Ефремовым, Алёна Яковлевам, Аринам, тыгак «Вената», «Сескем» ден «Юлас» дуэт-влакым, «Морко кундем», «Эрэҥер», «Локама», «Юлавий» ден «Мурйолва» ансамбль-влакым палемдаш лиеш. Татарстан, Башкортостан, Удмуртий, Коми республикла, Свердловск область гычат шуко мурызо ден коллектив тыште кумда сценыш икымше ошкылым ыштеныт.

Кумданрак — «Марий Эл» газетын
2017 ий 11 ноябрьыште лекше номерыштыже лудын кертыда.

Алевтина Байкова мутланен.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *