РУБРИКИ

Марий мланде – шочмо кундемем

4 ноябрьыште ме иканаште кок пайремым — Калыкын чак чумырген шогымо кечыжым да Марий Эл Республикын кечыжым – палемдышна. 

Пайрем-влаклан пӧлеклалтше торжественный погынымаш М.Шкетан лӱмеш марий национальный драме театрыште эртен. Тушто республикын правительствыжы членже, Йошкар-Ола администраций ден район вуйлатыше, депутат-влак, мер организаций-шамычын еҥышт, моло лийыныт.

Погынышо-влакым саламлышыжла, Марий Эл вуйлатыше Россий президент Владимир Путинын колтымо телеграммыжым лудын. Тушто тыге каласыме: «Патриотизм, гражданственность, шочмо элын историйжым пагалымаш, тудын пӱрымашыже верч вуйын шогымаш ятыр курымла дене калыкнам пеҥгыдыракым ыштеныт, нелылыкым сеҥаш, кугу державым ышташ полшеныт. Тидак кызытат мемнам виянракым ышта, кеч-могай тӱҥалтыште ӱшаным ешара».

Саламлымашан телеграмме-влак тыгак Россий правительстве председатель Дмитрий Медведев, РФ Федеральный Собранийын Федераций Советшын председательже  Валентина Матвиенко, РФ ФС Кугыжаныш Думын председательже Вячеслав Володин, Россий президентын администраций вуйлатышыже Антон Вайно, тыгак федеральный министерстве ден ведомство, субъект вуйлатыше, ятыр моло деч пуреныт.

Саламлымыж годым Александр Евстифеев тыге палемден:

— Марий автономный областьым ыштыме дене марий калыкын политический, социально-экономический да национальный вияҥмашыж деке корно палдырнаш тӱҥалын.

Тыгак тудо марий-влакын Пӱрыштӧ эртыше I-ше съездыштлан 100 ий темме, Марий Эл Республикым ыштымылан 100 ий теммешке кум ий веле кодмо нергенат ушештарен коден. Россий президентын указше дене келшышын, кызыт чылаштлан моткочак тӱҥ да кӱлешан юбилейлан ямдылалтмаш кайыме нерген ойлен.

Тиде пайрем погынымаште Александр Евстифеев профессийыштышт сай пашашт дене ойыртемалтше еҥ-влаклан кугыжаныш награде-влакым кучыктен.

Калыкын чак чумырген шогымо кечылан да Марий Эл Республикын кечыжлан пӧлек семын кугу пайрем концерт лийын.

Погынышо-влакым нине пайрем дене тыгак Россий президентын Юл кундем федеральный округышто полномочный представительжын полышкалышыже Владимир Колчин, Марий Эл Республикын Кугыжаныш Погынжын председательже Юрий Минаков, РФ ФС Кугыжаныш Думын депутатше Сергей Казанков саламленыт.

Пайрем-влак лӱмеш тиде кечын республикнан кажне райрӱдыштыжӧ, клуб ден тӱвыра пӧртлаште, моло учрежденийыште тӱрлӧ мероприятий эртен. Мутлан, Звенигово олаште, тӱвыра да каныме «Мечта» рӱдерыште, «Единство поколений» пайрем программе, ты олаштак, межпоселенческий библиотекыште, «Марий мланде – шочмо кундемем» почеламут конкурс, йоча лудмыверыште «Землие моей минувшая судьба» модыш да туныктымо программе, районысо тӱвыра учрежденийлаште концерт ден каныме, куштымаш кас эртеныт.

Йошкар-Олаште, тӱвыра да каныме рӱдӧ паркыште, калыкым «Чаплане, Марий Эл!» концерт программе дене куандареныт. Марий тӱвыра рӱдер Чарла Кремльыште тыгак пайрем концертым ончыктен. Погынышо-влакын кумылыштым «Сото вий» ден «Чон оҥгыр» фольклор коллектив-влак, «Юкече» йоча вокал ансамбль, икмыняр мурызо сылнын муралтен-кушталтымышт дене нӧлтеныт.  

Л.Камалетдинова.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *