КУЧЕМ УВЕР

Ынде шӧр кочкыш денат чаплана

Арня утларак ончыч «Звениговский» агрохолдинг Шолэҥер посёлкышто шӧр цехым почын. Кодшо кечылаште тушто Марий Эл вуйлатыше Александр Евстифеев лийын. 

Тиде предприятий чапле качестван 15 тӱрлӧ кочкышым – шӧрым, кефирым, ӱмбалым, ряженкым, снежокым, ушкал ӱйым, вараже  мороженыйымат – лукташ шона. Кызытеш заводын куатше тӱрыс огеш кучылталт. А ончыкыжым суткаште 25 тонн шӧрым перерабатыватлен кертыт.

Республик вуйлатыше производство пӧлем-влакым ончен савырнен, пашаеҥ-влак дене мутланен, технологий ойыртем, качествым кузе тергыме, могай ешартышым кучылтмо нерген йодыштын. «Звениговский» СПК-н председательже Иван Казанков кочкышым ыштымаште шкеныштын натуральный сырьёшт гына кучылталтеш манын ӱшандарен каласен. Шӧр цех вуйлатышын умылтарымыж почеш, кочкыш йӧрварлашке стабилизаторым, искусственный добавкым, кушкыл ӱйым да кукшо шӧрым огыт ешаре, сандене нуно кӱчык жап аралалт кертыт.

Тыршен пашам ыштымылан Александр Евстифеев тауштен да ойлен:

— Завод кокияш программе дене келшышын, кредитлан эҥертыде чоҥалтын. Ужына: тыште импортым вашталтыме йӧн кучылталтын – шкенан элыште ыштыме оборудованийым вераҥдыме. Производствышто чылажымат автоматизироватлыме.

Регион вуйлатыше шыл кочкышым ямдылыше производствымат ончен лектын да предприятийын вияҥмыжым – сату ассортимент ешаралтмым, ужалымаш кугеммым, цехлаште жаплан келшыше оборудованийым вераҥдымым – палемден.

Производствым кумдаҥдышашлан кызыт предприятий эше ик инвестиций проектым илышыш шыҥдара – Морко районысо Эҥерсола ялыште 3000 вуйлан ушкал комплексым чоҥаш тӱҥалын. Кызыт комплексын икымше черетшым (600 вуйлан) ыштат. Тӱрыс пашалан 200-250 млн теҥге ойыралтшаш.

— Ме ужына: тыште паша каныш да пайрем кечылаштат шуйна. Вес ий шыже марте тудым ыштен шуктат манын ӱшанаш лиеш, — каласен А.Евстифеев Морко районышто ты чоҥымо площадкыште лиймыж годым.  

Кызыт республикыште 17 тӱжем ушкалым ашнат гын, 2025 ийлан ты чотым 30 тӱжем марте ешараш, а талукаш чумыр лӱштышым 180 тӱжем тонныш шукташ палемдалтеш.  

Л.Камалетдинова.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *