МАРИЙ ЙӰЛА

«Шочмо вер – шӧртньӧ шепка»

Кодшо кугарнян Шернур тӱвыра пӧртыштӧ йоча творческий коллектив-влакын «Шочмо вер – шӧртньӧ шепка»(Калык йӱлан вий-куатше) республик кӱкшытан фестивальышт лийын.

Тудо районышто ынде кумшо гана эртаралтеш, но республик кӱкшытыш икымше гана лектын. Сандене участник-влакат ешаралтыныт. Тений тушко У Торъял районысо Тошто Торъял, Советский районысо Роҥго, Параньга районысо  Пӧртанур, Марий Турек районысо Карлыган школ-влак ушненыт. Фестивальыште йоча-влак марий, руш, татар, одо калык-влакын тӱвыра да илыш йӱлашт дене палдареныт. Ончаш толшо-шамычланат оҥай лийын, йӱлам ончыктышо-влакат ӧрыктареныт.  

Фестивальым Шернур районысо йоча творчество пӧрт «Роза ветров» республикысе йоча да самырык-влакын рӱдерышт, районысо образований пӧлка да Марий Элысе Образований да науко министерствын полшымыж дене эртарен. Но тыште Анастасия Глазыринан тыршымашыжым поснак палемдыман. Тудо йоча творчество рӱдер вуйлатышын алмаштышыжлан да краеведений шотышто методистлан ышта. Ончысо кок фестивальжат тудын тыршымыж дене эртаралтын. Фестивальыш ушнаш ӧрдыж кундемла гычат участник-влакым кумылаҥден кертын.

Калык йӱлам шымлаш,  костюмым, реквизитым ямдылаш, варажым тудым тӱшка калыклан сцене гыч  ончыкташ куштылгыжак огыл. Икмыняр ончыктымо йӱлаже чылалан палыме лийыныт гынат,  южо татшым ойыртемалтше муро-куштымаш дене пойдарен ончыктымо дене вес семын ончалтын. Мутлан, Шернур посёлкысо 1-ше №-ан  школын «Шорыкйол» йӱлажым налаш. Марий деч посна кодшо кок шочан ава Васли кува ден кугыза-влакым вашлие. Шернур районысо Лажьял тунемше-влак «Ӱдыр тулартымаш», А Кукнур школ «Ӱдыр пура» йӱлам модын ончыктышт. Марийсола школ «Узыпка пукшымаш» дене куандарыш. А теве У Торъял районысо Тошто Торъял школ марий сӱанын ик ужашыже, качын ӱдыр суртыш толмо сӱрет дене куандарыш. Шкеныштын палемдымышт почеш, йӱлам ончыктымаште тунемше-влак дене пырля эсогыл школ директор, ОБЖ, моло предметым туныктышо-влакат участвоватленыт. Торъял вел сӱан вургемже, рӱжге мурен чӱчкымыжӧ чыланыштлан келшыш.

Ончыктымо ятыр йӱлажым кызытсе икшыве-влак огытат пале, очыни, сандене фестиваль тидын денат шерге: калык йӱлам мондаш ок пу. Мутлан, Шернур районысо Калий школын тунемшыже-влак телымсе Святке арняште руш калыкын ик сурт гыч весыш коштмо йӱлажым ончыктышт. Казанский школысо  ӱдыр-рвезе-влак фестивальыш руш калыкын ӱдырым тулартыме йӱлашт дене толыныт ыле. Роҥго школ «Шошым вашлийме», Шернур посёлкысо 2-шо №-ан школ руш калыкын ӱдыр-каче-влакын кастене шинчыме йӱлаштым ончыктен. Карлыган школ одо калыкын  у пӧртыш илаш пурымо, Пӧртанур школ гыч «Тамчы» ансамбль  татар калыкын комбым кӱтымӧ йӱла дене  палдареныт.  Фестивальыш эше Звенигово, Оршанке районла гыч участник-влак транспортлан кӧра толын кертын огытыл.

Жюриштат пагалыме, чапым налше, МарНИИЯЛИ-н, Марий кугыжаныш университетын шанчызыже-влак Тамара Молотова, Татьяна Золотова, Никандр Попов, тыгак «Душа России» премийжын лауреатше Лидия Веткина, Йошкар-Оласе Йоча творчество рӱдер вуйлатыше Марина Дмитриева, «Роза ветров» рӱдерын методистше Ирина Дмитриева лийыныт. Мутат уке, тыгай конкурсышто жюрилан сеҥыше-влакым палемдаш куштылго лийын огыл. Кажне команде тӱрлӧ номинацийыште лауреат лӱмым налын.

 Сеҥыше-влак: Калий школ – «Калык тӱвырам аралымылан»;

Шернурысо 1-ше №-ан школ – «Эн сай аутентичный костюмлан»;

  Марий  Турек Карлыган школ – «Йӱлам чын ончыктымылан»;

 Лажьял школ – «Темым сайын да тичмаш почын пуымылан»;

«Тамчы» ансамбль – «Сценыште оригинально ончыктымылан»;

Тошто Торъял школ – «Муро-куштымаш йӱлам сайын ончыктымылан»;

Шернур посёлкысо 2-шо №-ан школ – «Эн сайын мурымо мастарлыклан»;

Кукнур школ – «Йӱлам историй да этнографий могырым чын ончыктымылан»;

 Марисола школ – «Эн сай режиссёрский пашалан»;

Роҥго школ – «Эн сай актер ансамбльлан».

Посна мастарлыкылан палемдыме влак:

Д.Лебедева ден Анна Власова – эн сайын йула мурым мурымылан (Шернур посёлкысо 2-шо №-ан школ);

 Карлыган ден Тошто Торьял школлан коллективышт –  йӱла куштымашым эн сайын ончыктымылан;

   Д.Веденькин  (ССШ №1) ден  А.Романова (Казанский школ)  эн сай актер лийыныт.

Фестивальым национальный президентский искусство школын «Кӱсле» образцовый ансамбльже (вуйлатышыже Е.И.Васютина)  сӧрастарен.

Фестивальым спонсор-влак эртараш полшеныт. Нунын дене пырля организатор-влак поснак «Газпром газораспереление Йошкар-Ола»  ООО-н генеральный директоржо, Марий Эл Республикын Кугыжаныш Погынжын депутатше А.Н.Ереминлан тауштат.

Светлана Носова.

Снимкылаште:

М.Скобелевын фотожо.

Опубликовать в Одноклассники