МАРИЙ ЙӰЛА

Ӱмыр мучко – чон йодмо пашаште

Татьяна Геннадьевна Иванцова дене Йошкар-Олаште эртыше ик ончерыште палыме лийна. Еҥ-влаклан ончыкташ кондымо да налаш темлыме пашаже-влак ойыртемалтше улмым ужын, шкеж дене палыме лияш кумыл лекте.

 

Ӱдырамаш рӱдоласе «Гармоний» школышто технологийым туныкта.

– Кидпашам ӱмырем мучко ыштем. Шке жапыштыже Казаньыште ик фабрикыште тӱрым тӱрлымӧ цехыште мастерлан тыршенам. Мый профессионал тӱрызӧ улам. А «Гармоний» школыш чон йодмо почеш толынам, молан манаш гын йоча-шамыч дене пашам ышташ моткоч йӧратем, – каласкала кидмастар. –  Шукынжо путырак талантан улыт. Иктаж-мо улан туныктымо годым ик гана ончыктымат сита – вигак чылажымат кӱлеш семын ыштат. Теве тышке кондымо паша кокла гычат шукыжо – йоча-шамычын усталыкышт.  

А тиде радамыштыже мо гына уке: пушкыдо модыш, шер гыч тӱрлӧ наста, куэм лапчыкла гыч пидме изи ковёр, заколко, шӱйым сӧрастарыме подвеске …

Мут толмашеш, Татьяна Геннадьевнан туныктымо икшыве-шамычын лапчыкла гыч пидме кугу одеялышт ӱмаште Йошкар-Олаште эртаралтше «Творение рук» конкурсышто икымше вер дене палемдалтын. Мо оҥайже, тушто кокымшо верымат тудын тунемшыжак тасма гыч тӱрлымӧ сӱретше дене налын. Тугеже ӱдырамашын нунын дене шинчылтмыже  арам лийын огыл. Адакшым тиде эше кугу мастарлык нерген ойла.

– А шкендажын кидпашам ыштен шинчылтмыда шуэш мо? – йодым.

– Шуэш. Пытартыш жапыште тыгай кумыл, мӧҥгешла, утыр веле лектын. Ончыч, шке икшывем-шамыч изишт годым, кидпашалан жапым муаш нелырак лийын. Кызыт нуно кугу улыт. Ынде яра жап шукырак,  шонымем семын могай-гынат кидпашам кучен шинчын кертам, – мане Татьяна Геннадьевна.    

– А могай сынан кидпашам ышташ утларак келша?

– Чыным ойлаш гын, ала-мом иктым ойырен каласенат ом керт. Ик жап шер дене шинчылтам. Шерем темаш тӱҥалмыла чучеш да лапчыкла гыч коверым пидам. А тидыже эше пайдале паша манаш лиеш, вет тудым ышташ мӧҥгыштӧ пуракым поген кийыше тошто майкым, чеверрак тӱсан йоча колготкым, молым кучылтам. Тыге моткочак сӧрал да шокшо ковер лектеш, – палдарыш ӱдырамаш.

Чынак, выставкыш кондымо паша-влак коклаштат лач тиде йӧн дене пидме изи ковёрак ончаш толшо кажне еҥын шинчашкыже чевер улмыж дене эн ончыч пернен, очыни.

Кидмастар эн кугу пашажлан куэм лапчыкла гыч «городецкий роспись» йӧн дене ургымо паном шотла. Тудын кугытшо чынжымак ӧрыктарыше: сӱрет ик метрат пеле лопкытан да кок метр кужытан!

– Пытартыш жапыште йоча-шамычым фоамиран гыч пеледышым ышташ туныктем. (Фоамиран – тиде замше гайрак сынан материал. Тудо кидпашам, мутлан, аппликацийым, бижутерийым, моло сӧрастарыме настам  ыштымаште, пӧрт кӧргӧ интерьерым сылнештарымаште пытартыш жапыште поснак кумдан кучылталтеш – авт.) Тиде йӧн дене кидпашам шукерте огыл гына ямдылаш тӱҥалыныт, сандене тудо моткочак модныйлан шотлалтеш. Поснак самырык-шамыч тудын дене кумылын пайдаланат, – палемдыш кидмастар. – Тиде йӧнлан эҥертенак, мутлан, марлан кайыше ӱдырлан пеледыш аршашым ыштат. Тыгак заколко, брошь сӧралын ончалтыт. Ялт чын пеледышым кучылтын ыштымылак койыт!

Южгунам туныктышо-влак весе-влакын шочшыштлан кугурак тӱткышым ойырат, а шкеныштын ӧрдыжеш кодыт. Но Татьяна Геннадьевна шке икшывыже-влакымат кидпашалан кумылаҥден да туныктен. Мутлан, 15 ияш изирак Настя ӱдыржӧ аваж декак «Гармония» школыш коштын, тудо мом туныктен, кызыт ӱдыр чылажымат ыштен мошта. Роман эргыже кызыт ешан. Тудо эсогыл пидаш йӧратен. Ончыкыжым ала тудак шке шочшыжо-шамычым кидпашалан туныкта…

Любовь Камалетдинова.

Авторын фотожо.  

Опубликовать в Одноклассники