УВЕР ЙОГЫН

Паша лектыш могай – пайрем тугай

У Торъял районысо «Первый май» колхозышто ялозанлык пашаеҥын кечыжым моло ийласе семынак теният кумдан палемденыт. 

Кодшо кугарнян тӱҥалтыште чыланат Чӱксола тӱвыра пӧртыш чумыргеныт. Погынышо-влаклан колхоз вуйлатыше Аркадий Новиков паша лектыш, могай кӱкшытыш шумо нерген каласкален. Тылеч вара кажне фермыште, трактор бригадыште, автопаркыште, чоҥышо-влак коклаште эн сай пашаеҥ-влакым саламленыт да кажныжлан окса премийым кучыктеныт.

Тиде колхозышто тыршыше ик пашаеҥ Россий Ялозанлык министерствын Тауштымашыж дене, ик еҥ Марий Эл правительствын Чап Кагазше дене палемдалтыныт. Ойыртемалтше пашаеҥ-влаклан тыгак район администрацийын Почетан Грамотшым кучыктеныт.

Торжественный ужаш деч вара погынышо-влакым «Марий Эл» куштышо кугыжаныш ансамбль ден Я.Эшпай лӱмеш марий кугыжаныш филармонийын артистшышт, чылаже 30 еҥ, моткочак сӧрал концерт дене куандареныт.

Ялозанлык пашаеҥын кечыже лӱмеш пайрем умбакыже райрӱдысӧ столовойышто шуйнен. Тудо кочмаш-йӱмаш, пырля мурен-куштымаш дене мучашлалтын.

Л.Камалетдинова.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *