УВЕР ЙОГЫН

Раиса Горбачеван машинажым ужында?

Автомобилистын кечыжым, вес семынже тудым эше водительын кечыже маныт, У Торъял поселкышто ты гана поснак ойыртемалтшын палемденыт. 

Тиде пайрем лӱмеш верысе тоштерыште «Ик уштыш почеш весе» ончер, книгагудышто «Тачысе кечын профессийже» книга выставке лийыныт. Поселкысо Тыныслык площадьыш мийыше-влак йоча модыш машина ден «Мыйын ачам – водитель, мыйын авам – водитель» выставке-влак дене палыме лийын кертыныт.

Ик эн оҥайже, очыни, ретротехнике парад лийын. Тудым У Торъял поселкыштак илыше да верысе предприниматель, машинам коллекционироватлыше Андрей Куклин эртарен. Технике парадым ончаш поселкышто да районышто илыше-влак веле огыл, вес кундем ден регионла гычат еҥ-влак лӱмынак толыныт.

А пӧръеҥ, чынжымак, ойыртемалтше машина-влакым ончыкташ луктын. Тиде, мутлан,  Раиса Максимовна Горбачеван лимузинже, 1928 ийыштак ыштыме да пу спицан автомобиль, чапланыше «Ласковый май» группым чумырышо Андрей Разинын машинаже, «Операция «Ы» фильм гыч «инвалидке», икмыняр моло. Ойыртемалтше улмыштым шотыш налынак, погынышо-влак кокла гыч шукынжо нуным ужын веле аклен огытыл, кабинышкыжак шинчын онченыт.

Умбакыже «Автоледи» конкурс, йоча-влаклан модыш программе эртаралтыныт.

Пытартышлан кумылан-влаклан тӱвыра да каныме рӱдерыште «Форсаж-8» фильмым ончыктеныт.

Л.Камалетдинова.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *