КУЧЕМ УВЕР УВЕР ЙОГЫН

Александр Евстифеев Марий Элысе Правительствын у структурыжым пегыдемден

Марий Эл Республик вуйлатыше Александр Евстифеев 27 октябрьыште «Марий Эл Республикын исполнительный кучем органже-влакын структурышт нерген» Указ йымалан кидпалыжым пыштен. 

У правительстве 21 ноябрь марте ышталт шукталтшаш. Могай должностьышто кӧ ышташ тӱҥалшашат варарак пале лиеш. А кызытеш могай структур лийшашым палемдыме.

Ондаксе дене таҥастарымаште, теве могай вашталтыш-влак лийыт. Але марте республик вуйлатышын 10 алмаштышыже лийын гын, ынде 7 кодеш. Но нуно иканаште алмаштыше да министр огыт лий.

Куд алмаштыше Марий Элыште, икте Москваште пашам ышташ тӱҥалыт. Пытартышыжак республикын Постоянный представительствыжым вуйлаташ тӱҥалеш.

У структур дене келшышын, икымше алмаштыше-влак кумытын лийыт. 13 министр пашам ышташ тӱҥалеш. Юстиций дене кылдалтше йодыш-влакым у ведомство – внутренний политике, верысе самоуправленийым вияҥдыме  шотышто да юстиций министерстве – рашемдаш тӱҥалеш.

Штат расписанийыштат вашталтыш-влак вучат.

— Тидын нерген мый але марте ик гана веле огыл ойленам, кызытат пеҥгыдемдем: у правительстве иземеш. Тидыже оптимизацийлан кӧра ышталтеш. Мутлан, республик вуйлатышын кум алмаштышыжым кораҥдыме. А тыге гын, нунын полышкалышыштын, специалист ден консультант-влакын, секретариатын должностьышт пытаралтыт.

Мыйын шонымаште, республикын правительствыжын пеҥгыдемдыме структуржо регионын исполнительный кучем задачыже-влаклан тӱрыс келшен толеш, — палемден Александр Евстифеев.

Л.Камалетдинова.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *