«МАРИЙ ЭЛ» ТАЧЕ

«Марий Эл»: 2017 ий 28 октябрь

28 октябрьысе газетыште Г.Зайниев «Эрык илыш верч кредалаш каена…: материалыштыже Шернур район Кускин ялын эргыже, журналист, офицер, ача Очий Ондре (А.П.Очиев) дене палдара. Тудо Кугу Отечественный сарыште лиймыж годым мӧҥгыштӧ, У Торъялыште», вучен илыше Поля пелашыжлан да Люба ден Роза ӱдыржӧ-влаклан возенак шоген. Серен марлат, рушлат, тидын годым прозо гыч поэзийыш куснен. Векат, тудлан руш йылме утларак лишыл лийын, сандене почеламутан серышлажым тиде йылме дене гына возен. Нине шергакан шӱм-чон документ-влак Т.Евсеев лӱмеш национальный музейын фондыштыжо аралалтыт. Нуным шымлыме да йоча-влаклан палдарыме суапле пашам Кукнур кыдалаш школышто ИКН предметым туныктышо И.Петрова шуктен шога. 

У ий кожым тений кушко шогалтат? Тидын да моло уверым «Рӱдола: таче да эрла» рубрике йымалне савыкталтше материал-шамыч каласкалат.

 21 октябрьыште Республикысе курчак театрыште Марий Элын сулло артистше Марианна Сильвестрован бенефисше эртен. Ты кечын театрыш толшо-влак тудым артист веле огыл, мурызо семынат ужын кертыныт. Актрисе пайремышкыже шочмо Курыкмарий кундемже гыч театр коллективым веле огыл, мурызо-шамычымат (Лидия Кучера, Маргарита Синуткина, Александр Веткин, Владислав Зотин, гармоньчо Арсений Яйцов да молымат)  ӱжын. Уста актрисе нерген А.Байкован налме интервьюштыжо  кумданрак пален налаш лиеш.

Йошкар-Оласе Чарла кремльыште эртыше регион-влак кокласе «Угинде» пайрем гыч фоторепортажым М.Скобелев ден Р.Николаева темлат. Пайрем жапыште марий модыш дене модмаште кажныже шке вийжым терген кертын. Мутлан, ӧранвочко дене ӱйым ӱчаш-ӱчаш шӱшкаш иканаште икмыняр еҥ лектын. «Угинде» тыгак чеслан да мурымаш-куштымашлан поян лийын.  

31 октябрьысе газет «Ӱдырсий» республик кӱкшытан конкурс гыч репортажым темлена. Тудо 29 октябрьыште йоча да самырык-влаклан республикысе театр-рӱдерыште эртен. Тушко кундемыштына илыше 18-25 ияш марте ийготан ӱдыр-влак ушненыт.

«Оҥай еҥ дене вашлиймаш» рубрике Звенигово район Какшамарий кундемыште илыше Евгений Николаевмытын мастар ешышт да Шернур район Ондроп почиҥга ял гыч Владимир Антропов дене палдара.

«Сылнымут садвечыште» лаштыкыште Марий Эл культурын сулло пашаеҥже, М.А.Кастрен ушемын сылнымут премийжын лауреатше, Марий Эл Республикысе С.Чавайн лӱмеш кугыжаныш премийын лауреатше Зоя Дудинан почеламут подборкыжым савыктыме. Уста поэт, журналистлан тений 3 ноябрьыште 55 ий темеш.

Г.Кожевникова ямдылен.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *