МАРИЙ ЙӰЛА

Ик тымык ото уло Кугуваныште

Шукерте огыл «Марий Эл» газетыште «Шкенан шнуй верлам кузе аралена?» материалым савыктыме деч вара редакцийыш Медведево район Кугуван ялын старостыжо Михаил Веревкин йыҥгыртыш.  «Марий Элын Тӱвыра, печать да калык-влакын пашашт шотышто министерствыжын кид йымалныже улшо Тӱвыра поянлык объект-влакым арален кодымо, пайдаланыме да оролымо шотышто управлений вуйлатыше Ааурика Михеева дене интервьюм лудын лекмеке, шкенан ял воктенысе тошто  ото шотышто тургыжланымашем ойлынем. Кертыда гын, толза, отым кушко шуктымым ончал кайыза», – мане. Фотокореспондентна Михаил Скобелев дене коктын корныш тарванышна… 

Ончылгоч мутланен келшыме почеш, мемнам Михаил Михайлович Светлана пелашыже да еҥгашт, 75 ийыш тошкалше Любовь Чернякова, дене пырля отыш пурымаште вашлийыч. Мо шинчаш вигак перныш? Ото «Кӱшнур» сад обществыш пурымаштак верланен. Изирак гынат, куэ, кож, пӱнчӧ, моло кушкыл ситышын уло. Онапужо монь аралалт кодын огыл, кеч ончыч чыла лийын, палемдышт вашлийше-влак. Но, отым руаш тӱҥалмеке, изирак кумдыкшо веле кодын. «Кеч руышо-влак тидлан кӧра ойгышкат логалыныт. Кызыт тушто огыт кумал, но шарнем: ожно агавайремымат, шыже кумалтышымат эртареныт. А кызыт ты отылан чонем моткоч коржеш. Шонымем ойлаш манын, лӱмын тендан деке вашлияш толынам, – каласыш Любовь Петровна.

 – «Кӱшнур» сад обществыже ото деч пурла велне верланен. Шке жапыштыже отыжымат тидлан кӧрак руаш тӱҥалыныт, – умылтарыш Михаил Михайлович.  Вара веле верысе чолга еҥ-влакын тыршымыштлан кӧра тыгай осал пашам чарен  кертыныт. Кызыт ынде сад товариществыштыжат илыш ончычсо гай ок шол. Кудалтен кодымо, яра шинчыше участке ятыр. Кучышыжо кучат, шке мландыштым  тӱзатат. 120 нарын улыт, но южышт толын веле каят. А толшыла але кайышыла, чыла шӱкшакыштым ото ден сад гыч лекмаште вераҥше кумдыкыш кышкен кодат. Ончыч тидлан лӱмынак кугу контейнер шоген гын, тудыжат ынде лунчырген. Санденак погынышо тор йырымваш пӧрдалеш, чоҥештылеш, мынярже мардеж дене ӧрджкӧ пӧрдын кая. Тыгак отышкат чоҥештен пура. 

Кумданрак — «Марий Эл» газетын
2017 ий 28 октябрьыште лекше номерыштыже лудын кертыда.

Светлана Носова.
М.Скобелевын фотожо.

Опубликовать в Одноклассники

Добавить комментарий