КУЛЬТУР ДА ИСКУССТВО ТЕАТР

Театр илыш: «Шкет кукун мурыжо»

13 октябрьыште Йоча да самырык-влаклан республикысе театр-рӱдер черетан тургымжым Татьяна Соловьёван почеламут корно дене возымо поэмыж почеш шындыме «Шкет кукун мурыжо» спектакль дене почо. 

Тудым самырык режиссёр Эрвина Гордеева сценыш луктын.

Почеламут корно дене возымо поэме почеш шындыме спектакль сценыште шуэн вашлиялтеш. Сандене ты ганат тудым калык кузе вашлиеш манын шонымо. Тидын шотышто ончышо-влакат, а эн чотшо автор тургыжланеныт, шонем. Вет тиде — Татьяна Соловьёван икымше пашаже.

Спектакльым кок кече почела ончыктеныт. Тудым кок состав дене ямдылыме. Тӱҥ рольым, Луизам, Марий Элын сулло артистше Любовь Купсольцева ден артист Татьяна Окунева модыныт.     

Постановкышто марий эстрадын шӱдыржӧ Луизан илышыже почылтеш. Жапше годым тудо чапланыше артист лийын, шуко концертым эртарен, гастроль дене кудалыштын. А варажым илышыже мӧҥгешла савырнен: тудо шкет кодын да ялышкыже пӧртылын, йоча, самырык годсо пагытшым порын шарналта. Тӱҥ герой дене пырля меат, залыште шинчыше-влак, памаш, эҥер воктеке, олык лапыш миен толна, аванам, кованам, школ йолгорным, ту годсо йолташнам  шарналтышна. Мутат уке, ик сӱрет кумылым нӧлта, а весе — шонаш, ойгыраш тарата, шинчавӱдымат луктеш.

Спектакль мурылан, куштымашлан поян. Нуно геройын чон-шижмашыжым, чон-йӧсыжым але куанжым келгынрак почын ончыкташ полшат.

Ончычсо семын декорацийлан тӱрлӧ арверым чия дене чиялтыме огыл, ты гана пастельный манме тӱс дене сценым келыштарыме. Марий кундемнан моторлыкшым куэ гоч ончыктымо. Спектакльыште идалыкын ик пагытше, кеҥеж, мотор пӱртӱсшӧ  дене куандара, пуйто кайыкат мура, памашат йыргыктен йога. Сценыште волгыдым, тӱтырала койшо ошым мастарын кучылтмо.

Тӱҥ геройын ик жап гыч весыш куснымыжым вургемым вашталтен чийыме дене ончыктымо. Тидыже, мутат уке, залыште шинчыше калыклан вучыдымо ыле.

Икманаш, самырык режиссёрын у шӱлыш, у ончалтыш дене ямдылыме пашажым калык шокшын вашлие. Спектакль пытымекат залыште шинчыше-влак кужу жап совым кыреныт, тауштеныт.

Кумданрак — «Марий Эл» газетын
2017 ий 21 октябрьыште лекше номерыштыже лудын кертыда.

Алевтина Байкова.
(Фотом театрын архивше гыч налме.)

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *