ТОШКАЛТЫШ

Сочи гыч – поро кумыл дене

14-22 октябрьыште Сочи олаште Самырык ден студент-влакын тӱнямбал фестивальышт эртен.  Марий Эл гыч тушко 125 участник ден 40 волонтер миеныт. Чылаже фестивальыш 180 эл гыч 20000 ӱдыр-рвезе чумыргеныт. 

Ты тӱнямбал кӱкшытан мероприятийыште Сургутышто илыше марий-шамычат лийыныт. «Марий Ушем» мер организацийын Сургутысо отделенийжын председательжын алмаштышыже Алексей Ибашев фестивальыште марий койышыжым почын ончыктен. Тудо Хант-Манси автономный округын делегацийже дене пырля тудо кундемыште илыше калык-влак дене палдарен: марий тувырым чиен, калыкнан кочкышыж дене сийлен.

– Ты фестивальышке миен толмеке, умылаш лийдыме поро кумыл шочеш. Шоналташ гын, ме историйын ик ужашышкыже пуренна, ятыр лӱмлӧ еҥым ужынна. Тыгак тушто лийме дене илышым келгынрак умылаш, тудым чотрак аклаш тунемынна, – каласен А.Ибашев.

Марий Эл гыч ӱдыр-рвезе-влакат Сочи гыч весела кумылан пӧртылыныт. Татьяна Шашкова ден Татьяна Япаева фестивальым петырымаштат лийыныт, Российын Президентше Владимир Путиным шке шинчашт денак ужыныт. Моло марий участникна-шамычат мероприятийыште усталыкыштым ончыктеныт, тӱнямбалне илыше вес калык-влаклан марий тӱвыранам мурына, куштымашна, вургемна гоч почын ончыктеныт.

– Сочи гыч поезд дене тарваныме годым шӱлык кумыл авалтен. Чонемын ик ужашыже тушто кодын, тыгак икмынярже фестивальыште палыме лийме йолташ-влак дене вес эллашке каен. Ты мероприятийыште лийме эре шарнымашеш кодеш. Илен-толын, тидын нерген икшывем, уныкам-шамычлан каласкалаш тӱҥалам. Ӱшанем, ты фестивальыште вашлийме йолташем-влак дене эше иктаж-кунам ужына, – чон почын каласыш Т.Шашкова.

Л.ШАБДАРОВА.

Опубликовать в Одноклассники

Добавить комментарий