«МАРИЙ ЭЛ» ТАЧЕ

«Марий Эл»: 2017 ий 21 октябрь

2016-2017 ийлан Марий Эл Республикын Литератур, искусство, архитектур, науко да технике шотышто кугыжаныш премийжым пуышашлан конкурсыш налме произведений ден паша-влакым каҥашымашке луктеш. претендент-влак нерген шке шонымашым возен колташ творческий ден общественный организаций да молат 20 ноябрь марте каҥашымашке ушнен кертыда. Кандидатур-влакын лӱмыштым тӱрыс газетыште савыктена.

Кодшо шуматкечын Кужэҥер район Аганур ялыште да Руш Шой кыдалаш школышто ты кундемын эргыже, туныктышо, литератор, шанчызе, мер пашаеҥ, марий калыкын ончылъеҥже Иван Ефимович Романов-Одарын шочмыжлан 130 ий темме кечым кумдан палемдышт, шочмо ялешыже шарнымашан кӱм шогалтышт. Тидын нерген кумданрак – «Марий Эл» газетыште.

21 октябрьыште лекше «Марий Эл» газетыште Д.Речкинын репортажше Угарман кундем Тоншай районышто илыше марий-влакын тачысе илыш радамышт, йӱлашт, койыш-шоктышышт дене палдара.

«Шочмо йылмым палыше кугу кӱкшытыш нӧлталтеш». Тыгай шонымашышт шочын 27-29 сентябрьыште Коми Республикыште РФ АФУН-ын погынжо деч вара Марий Эл гыч делегат ден эскерыште-влак Л.Абукаеван, Л.Иксанован, В.Ивановын да В.Петровын. Нуно «Йылме. Образований. Науко» секцийыште каҥашыме йодыш-влакым почын пуат. Пытартыш жапыште шочмо йылмым туныктымо нерген тӱрлӧ шонымаш коштмым делегат-влак секцийыште Россий Президентын администрацийже гыч представитель Наталья Бадьинан каласымыж дене шӧрат. «Национальный республиклаште шочмо йылмым кузе туныктымо, чыла тугак кодеш, тидын шотышто азапланыман огыл, а кугыжаныш йылме шотышто чылажат закон почеш лиеш», — манын тудо.

«Ӱдырамаш корнын» унаже – Пошкырт кундемын шочшыжо Ольга Якимова. Шке жапыштыже кугыжаныш службышто тыршен. Сулен налме канышыш лекмекыже, изи годсо шонымашкыже шуын – сценыш лектын мураш тӱҥалын. Кызыт тудым Александр Мамаев дене дуэт дене мурат. Еш илыш, ӱдырамаш пиал нерген умылымашыж дене газетна гоч палдара.

11-25 октябрьыште Йошкар-Олаште, Мер-политик рӱдерыште, Российысе дизайнер-влак ушемын «Истоки-17» декоративно-прикладной искусство всероссийский выставке-конкурсшо эрта. Ончерыште Марий Эл, Чуваший, Мордовий республикла, тыгак Российысе икмыняр ола гычат дизайнер-влакын интерьерыштым, плакатыштым, вургемыштым, декоративный арверышт-влакым чумырымо. Икмыняржым «Марий Эл» газетын пытартыш лаштыкыштыжат ужаш лиеш.

Светлана Пехметова

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *