УВЕР ЙОГЫН

Ме ик кугу еш гыч улына

18 октябрьыште Марий кугыжаныш университетыште Финн-угор калык-влакын родо-тукым кечыштлан пӧлеклалтше мероприятий эртен. Универсиетын студентше-влак тӱналтыште финн-угор йылме-влак дене саламлалтыныт, нунын чотышт, кушто илымышт дене палдареныт. 

МарГУ-н «Марий йылме» рӱдержым вуйлатыше Любовь Абукаева 27-29 сентябрьыште Коми Республикыште Сыктывкарыште РФ АФУН-ын погыныштыжо финн-угор калык-влакын йылмыштым туныктымо йодышым нӧлталме нерген каласкален. Шочмо йылмым аралаш, йӧраташ кӱлеш манын пеҥгыдемден каласен.

Варажым тений «Финно-угрий студенчествын миссше» конкурсышто сеҥыше Светлана Давыдова калыклан весела куштымашыжым пӧлеклыш. Удмурт кугыжаныш университетын студенткыже-шамыч оҥай сценкым ончыктышт да шке вел мурым йонгалтарышт. Ӱдыр-влак МарГУ-што декабрь мучаш марте тунемаш тӱҥалыт. Нуно икте-весе дене вашталтын тунемме программе дене тышке толыныт.

А кунам студент-влак марий калыкын вургем модо коллекцийжым сценыш ончыкташ лектыч, ончаш толшо-шамыч нуным совым рӱж кырен вашлийыч, чыланат кумылышт нӧлталте. Пайремым финн куштымаш шуйыш. Нунын почеш шинчыше-влакат тавалташ ямде лийыныт. Тыгак Альбертина Иванован эстон йылмыш кусарыме почеламутшымат сылнын лудын пуышт. Мучаште чыланат весела гармонь сем почеш марий такмак-влакым муралтышт. Икманаш, пайрем поро шӱлышеш эртен да тӱрлӧ калыкын шочшыжым ик ешыш ушен.

Л.ШАБДАРОВА.
М.Скобелевын фотожо.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *