ТОШКАЛТЫШ

Марий койышым Сочиште ончыктеныт

14-22 октябрьыште Сочи олаште Самырык ден студент-влакын тӱнямбал фестивальышт эрта.  Марий Эл гыч тушто 125 участник ден 40 волонтер пашам ыштат. Нунын коклаште марий ӱдыр-рвезе-влакат улыт. Нуно мыланна фестивальыште мом ыштымышт дене палдарат: 

Вероника МУСТАЕВА

– Фестивальын программыже моткоч поян. Чыла вере лийме, шукырак пален налме шуеш. Тыште икымше кече гычак ятыр площадке пашам ышта. Мутлан, коми-влак шочмо йылмышт дене рэпым мурыктат, эн сай мурышыжлан пӧлекым кучыктат. Чуваш республикын ӱдыр-эргыже-влак гын 21 гана приседанийым ыштыктат. Чылаже Российысе  21 регионын площадкыже уло. А Вологда кундемын еҥже-влак, пӱкеныш шогалтен, почеламутым уло йӱкын лудыктеныт. Мыят тиде верым эртен кайыде шым керт! Чылажым  онченат от шукто. Эх, кузе чыла вере шуаш!

Но мый Марий Элын делегацийже дене огыл, а вес отельыште, Сочи-паркыште илем. Тӱналтыште ӧрынам ыле, но шукын ойленыт, мылам пиал шыргыжалын. Очыни, тыгак. Ятыр у йолташ дене палыме лийынам. «Медиаблогинг» площадкыште пашам ыштем. Ты фестивальыште шкаланем шуко пайдам налам манын ӱшанем. Ме кумдан палыме кинорежиссёр Владимир Меньшов, дрессировщик Запашный дене вашлийынна. Икманаш, жапым оҥайын эртарена.

Татьяна ЯПАЕВА:

– Мый «Наукын ончыкылыкшо ден глобальный образований» площадкыште пашам ыштем. «Вконтакте» соцкылыштем фестиваль дене кӱчыкын палдарем, у еҥ-влак дене палыме лиям. 17 октябрьыште Марий Элын стендше воктене марий фотосетым эртаренна. Тушто марий муро йоҥген, марий вургемым чиенна, мемнан деке лишемше уна-шамыч дене мутланенна, нунылан икмыняр марий шомакым туныктенна, пырля шогалын войзалтынна. Мутлан, Куба гыч журналист  моткоч поро кумылан ыле, тудо шкеж нерген каласкалыш, марлат пелештыш. Тыгак вес кундемлаште илыше марий ӱдыр-рвезе-влакымат фестивальыште ятыр вашлийынна.

Тичмаш налмаште, мероприятий моткоч кумда, тушто тӱнямбалне илыше калык-шамычын тӱвыраштым, йӱлаштым сайынрак пален налаш лиеш. Поснак Российысе регион-влакын, тӱрлӧ элын площадкышт сайын ончыкталтыныт. Тушто чыла кучен ончаш, войзалташ, вургемыштымат чиен ончаш лиеш.

Л. ШАБДАРОВА

Опубликовать в Одноклассники

Добавить комментарий