ӰДЫРАМАШ КОРНО

«Кайыкат мужыр дене ила…»

Мо шкенжым шарна, мемнан унана — Пошкырт кундем Мишкан район У ял гыч Ольга Якимова — эре мура. Сандене изиж годымак тудо артист лияш, мураш шонен. Профессионал мурызо лийын огыл гынат, шонымашыже садак шукталтын — тиде ӱдырамашым пытартыш жапыште калык лачшымак мурызо семын пала. Поснак – самодеятельный автор да мурышо Александр Мамаев дене дуэт дене мурышо семын. Тылеч ончычат Ольга Васильевна кеч-кушто пашам ыштен гынат, самодеятельность дене эре пеҥгыде кылым кучен. Кызыт сулен налме канышыште гынат, алят моткочак чолга да чулым. Ольга Васильевналан шке ийготшым йӧршынат от пу. Эреак шыргыжал-воштылалын гына мутланымыжлан, моткочак кумылзак, весела койыш-шоктышан улмыжлан кӧрак пагыт тудым огеш шоҥгемде, очыни. 

Шочмо ешыштыже ачаже ветеринар, Лида акаж ден курскаже агроном лийыныт. Тидым шотыш налын, ӱдырат нунын корнышт денак каяш шонен. Луымшо класс деч вара отработкым ыштыме жапыште школышкышт  ик техникум гыч толыныт улмаш да Ольга эсогыл ветеринарлан тунемашат пурен шуктен. Тидын нерген шкеже тыге шарналтен каласкалыш:

— Мӧҥгышкӧ толмеке, тидын нерген ну вет куанен каласкалем! А ачай, тидым колын, эх,  вурсаш тӱҥале ве-ет! «Могай тылат ветеринар але агроном?! Тыйын тазалыкетше тыгай пашам ышташ огеш йӧрӧ!» — мане. «Тый эре артист лияш ойлет ыле. Артистетланак тунемаш кай», — каласыш тунам ачам.

Тыге луымшо класс деч вара Ольга Йошкар-Олашке толын да тунамсе культпросветучилищын  дирижерско-хоровой отделенийышкыже тунемаш пурен.

— Мемнан ешыште чыланат мураш йӧратат. Авам ончыч эсогыл татар  муро-влакым марлашке кусарен мура ыле. Кызытат иквереш чумыргена гын, эре  мурена.

Марий Элыш толмекак марий ӱдырлан тысе пӱртӱс ден климат тудлан лач келшен толыныт. Вараже Марий Эл гычак качылан марлан лектын да але мартеат марий республикыштак ила.

— Училищым пытарымеке, мыйым Кужэҥер поселкысо тӱвыра пӧртыш пашам ышташ колтышт. Тушко мийымекем, кумшо кечынжак, тиде февральыште лийын, ончыкылык пелашем дене палыме лийынна, а июльышто сӱан дене ушненна. Кӱшыл образованием укеат, мужыраҥмеке,  пединститутышто тунем лектынам. Тылеч вара Кужэҥер райисполкомышто орготдел вуйлатышылан ыштенам. Тунам партий пагыт ыле. Ты жапыште партий райкомым Владислав Максимович Зотин вуйлатен.

Илыш кунам да кузе савырнышашым ончылгоч иктат огына пале. Тӱрлӧ амаллан кӧра икмыняр жап гыч Якимовмыт еш Йошкар-Олашке илаш куснен. Тыштак Сергей эргышт икымше классыш каен.

Рӱдолаште Ольга Васильевна тӱҥалтыште архив управленийыште, вараже агропромышленный комплексыште ыштен. Пытартышыштыже  самодеятельность моткоч виян лийын. Тӱрлӧ деч тӱрлӧ концерт ден моло мероприятийым эртарымыштым кызытат куанен шарналта.  

 

Кумданрак — «Марий Эл» газетын
2017 ий 21 октябрьыште лекше номерыштыже лудын кертыда.

Любовь Камалетдинова мутланен.
Фотом еш альбом гыч налме.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *