ПАТЫРЛЫК

Иван Николаев: «Куш кайышашым ончылгоч паленам»

Тачысе лаштыкнан унаже – Морко район Йыр (Токсар) ялын чолга рвезыже Иван Николлаев. 

Ты рвезе дене ме тений июль тӱҥалтыште Килемар район Церкысолаште марий самырык тукымын слётыштыжо палыме лийынна. Йолташыже-влак тудын полмезын весела, кумылзак койышыжым, техникылан шӱман улмыжым палемдышт.

– Йолташ-влакет тыйым пеш моктышт, но тый кугешныше гай от кой…

– Мый проста марий рвезе улам. Спортым йӧратем, поснак волейболым, футболым. Марий самырык тукым слёт нергенжат волейбол дене пырля модаш мийыше палыме ӱдыр каласен. Тыге пӱрымаш мыйым уста, чолга, талантан марий ӱдыр-рвезе-влак дене ик жаплан ушен. Вес кундемыште илыше марий самырык тукымын илышыж дене лишкырак палыме лийынам, у йолташ-влакым муынам. Тений Юл кундемысе технологический университетын архитектур да чоҥымо институтым заочно тунем пытаренам. Шкеже Моркышто «Газпром трансгаз» компанийын компрессорный станцийыштыже пашам ыштенам.

– «Пашам ыштенам» манат, тугеже илыш корнетым вес йогыныш савыренат?

– Кызыт мый контракт почеш армийыште Самарыште служитлем. Слёт деч вара мӧҥгыштӧ изиш шогылтымат, вигак армийыш кайышым. (Тидым ме рвезе деч Интернет гоч рашемдышна- авт.) Военныйын профессийже изинек келшен. Рвезе-шамыч дене чӱчкыдын салтакын илышыжым «тамлен» модынна. А кугурак лиймеке, военныйлан корно шукырак почылтмымат умыленам. Нунылан пачерымат налаш куштылгырак, пашадар шотыштат тунар тургыжланыман огыл. Икманаш, куш кайышашым ончылгоч паленам.

– Тыйын шонымаште, марий ӱдыр-ввезе-влак таче шочмо йылмышт деч вожылыт мо?
– Тиде ик эн тургыжландарыше, чоным корштарыше йодыш. Тидым мый шкежат шижам. Но мемнан ялыште ньога-влак марла мутланат, а вот поселкышто тидыже шагалрак шижалтеш. Эркын дене икшыве-шамыч рушаҥ толыт. Садланак йочам изинек шочмо йылмылан шӱмаҥдыман. Мый гын марий улмемым нигушат шылтымаш уке.
А самырык-влаклан марий йылмым вияҥдымаште, шарымаште марий сынан мероприятий-шамыч полшат. Тидын шотышто Марий самырык тукымын слетшат кугу шӱкалтышым пуа, вет марий йылмыж дене шагал кутырышо але йӧршын мутланыдыме-влак, тушко чумыргымеке, йылмышт деке мелын савырнат, марла мутланаш тӱҥалыт.

Кумданрак — «Марий Эл» газетын
2017 ий 7 октябрьыште лекше номерыштыже лудын кертыда.

Лидия ШАБДАРОВА.
М.Скобелевын фотожо.

Опубликовать в Одноклассники

Добавить комментарий