КРИМИНАЛ УВЕР ЙОГЫН

Килемар районышто предпринимательын автомашинаж гыч оксажым шолыштыныт

Килемар районышто предпринимательын автомашинаж гыч ала-мо татыште шуко оксажым шолыштыныт. 

Чылажат пеш писын лийын каен. Ялысе шке кевытше ончылно «Газель» автомашинаж гыч сатум ястарышыжла, кабинжым петырыде коден. Пашам ыштымыж гутлаште шижынат шуктен огыл, тушан кодымо 163 тӱжем теҥгежым солалтенат каеныт. Тидын нерген 57 ияш амалкалче полиций отделыш увертарен.

Сатум шагат наре ястарен. Лач кевытыште лийме гутлаште барсеткыже йомын. Туштыжо окса деч посна документ-влак лийыныт.

Пиалешыже, полиций пашаеҥ-влак ворым писын муыныт. Тудо ты ялыштак илыше ондак судитлалтше 42 ияш пӧръеҥ лийын. Амалкалчын кевытыш пурымыжым вучен, поянлыкшым солалтен. Шолыштмын ужашыжым веле мумо, молыжым вор шылтен але шке кӱлешлан кучылтын.

А.Андреев

Опубликовать в Мой Мир
Опубликовать в Одноклассники

Добавить комментарий