ТАЗАЛЫК

Пациентын лукшо: Аралыза шкендам

Врач деке толшо кажне еҥ черлым тӱткын  колыштшо, умылышо да тергыше, сайын эмлыше профессионал дене вашлияш шона. Но ик пациентлан ойырымо жап нимучашдыме огыл, икмыняр минут гына. Докторын приёмжо пайдалын эртыже манын, черлылан икмыняр татым шотыш налаш темлена. 

Икымше, кидыште улшо чыла медицине документым (справкым, стационарын выпискыжым, тӱрлӧ анализ ден шымлымашын результатше-влакым) посна папкыште кучыман.

Кокымшо, медицине документын подлинникшым шке папкыште кучыман, копийжым поликлиникыш (амбулаторный картыш) але тудым йодмо верыш пуыман.

Кумшо, врачын приёмышкыжо анализын да моло шымлымашын результатыштым намийыман. Ты случайыште доктор пациентлан уто йодышым огеш пуэде, а черлылан неле медицине термонологий-влакым шарналташыже огеш кӱл. Чыла тиде жапым аныклаш да докторлан пациентым тӱткын тергаш, диагнозым чын шындаш, эмлалтме йӧным палемдаш полша.

Врач деке пурымо годым шуко пациент чот тургыжлана. Кабинет гыч лекмекыже, тидым але весым йодаш мондымыжым шарналта. Тыге ынже лий манын, тургыжландарыше йодыш-влакым ончылгоч кагазыш возыман. Тыгодым тазалыкыште палдырныше ситыдымаш-влакын жапыштым, нунын вияҥме сӱретыштым ончыкташ уто огыл. Мутлан, могай тылзын кудо кечынже кокыраш тӱҥалме, температур кӱзен, нерге авалтен, вуй корштен да молымат. Чыла тиде врачлан эмлалтме чын йӧным муаш полша.

Кызыт врачын паша кечыж ден жапшым телефон, интернет полшымо дене пален налаш да приёмыш ончылгоч возалташ йӧн уло. Частный клиникыште гын специалистын консультаций акшымат рашемдаш лиеш.  

Врачлан черын «койышыжым», тудын лийын кертме амалжым шылтыде, вожылде каласкалыман. Тылеч посна тымарте улшо черымат (сакыр диабет, бронхиальный астме, пагар йора, травме, операций) ушештараш кӱлешан. Тидыже докторлан чын диагнозым шындаш, черын формыжым (пӱсӧ але хронический) рашемдаш, шымлыме да эмлыме йӧным палемдаш полша.

Доктор дене мутланыме годым иктаж-мо раш огыл гын, медицине терминым умылтараш йодман. Специалистын эмлалтме шотышто темлымашыжым тӱткын колыштман. Иктаж информацийым, поснак нелынрак ушеш кодшыжым, мутлан, эмлалтме йӧнын, эмын, кушкылын лӱмыштым, блокнотышкат возаш лиеш.

Врач келша, тудын дене умбакыжат кылым кучымо шуэш гын, телефонжым, тыгак паша графикшым рашемдаш лиеш. Доктор ок келше, эмлыме йӧнжӧ кокытеланымашым луктеш гын, вес специалистын консультацийышкыже каяш кӱлеш.

Шкем шке эмлыман огыл! Тыгай ошкыл черым хроническийыш савырен, тазалыкым эшеат лунчыртен, диагностикым, эмлыме йӧным нелемден кертеш.

Шарныза, тазалык деч шергакан нимо уке! Аралыза тудым. Эмлыме тӧнежыш каяш кӱлеш гын, тиде жапым эр але кас марте ида шуйкале, чер шке эрта манын ида ӱшане. Специалист деке жапыштыже кайыза. Тидым ыштен огыда керт гын, вашкеполышым ӱжса. Весымат шотыш налза: тазалыкын состоянийже пациент дене пеш чак кылдалтын. Врач эмлалтме йӧным гына темла. Умбакыже пациент шке эмлалтеш…

М.ИВАНОВА

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *