«МАРИЙ ЭЛ» ТАЧЕ

«Марий Эл»: 2017 ий 30 сентябрь

! 1 октябрь – Илалше-влакын тӱнямбал кечышт. Тиде пайремлан пӧлеклалтше лаштыкыште шоҥго ӱдырамашын «Марий Эл» газетыш возымо серышыжым савыктена. «Тений августышто Марий Эл вуйлатыше А.Евстифеев рӱдоласе икмыняр корным тергыш. Мемнан илыме шуко орлыкан пӧртна воктекат, кондыш. Мый неле йодыш-влакым шкеак решатлаш тыршымынам шортын-шортын каласкалышым. Александр Александрович тунамак Йошкар-Олан мэржылан корным ышташ кӱштыш. Кум кече гыч кугорно воктенсе кумдыкым тротуарлан эрыкташ тӱҥальыч!  Кызыт тиде паша мучашке лишемеш», — нимучашдыме таумутым ойлен воза илалше ӱдырамаш. 

!  «Марий Эл, кузе тый шерге улат мыланна!» манын кычкыралеш  Марий Эллан 100 ий темме вашеш возымо статьяжын вуймутыштыжак М.Матукова. «Марий калыкын эн шерге поянлыкше —  тиде тудын шочмо-кушмо кугезе годсо мландыже. Марий кундемнам арален кодышаш верч мемнан кугезе кочана-влак курымла мучко мыняр кучедалыныт! Ынде теве  кумда Россий элыште уло марий калыкын  шкенжын шерге,  йӧратыме Марий Эл Республикыже, кушто поян сылне пўртўсшым, шочмо марий йылмыжым, йўлажым, культурыжым  аклен, ончыкылык самырык тукымым ончен-куштен, ял озанлык пашаште тыршен, кугешнен ила  шке тӱп калыкше дене марий калык». – манеш автор.    

«Оласе кугурак предприятийлам вуйлатыше иктаж марий еҥым паледа? Кодынат огытыл вет. Кӧ кодшыжым Марий Элнан марий калыкым пагалыдыме тылеч ончычсо вуйлатышыжак кораҥдыктыл пытарыш. Тидлан чонна корштен гынат, газетыште возаш лийын огыл. Шекланен возымымат савыкташ тоштмо огыл. Кол вуй гыч шӱеш, маныт гын, тудланат тыгай жап толын шуо – марий вуйлатыше-влакым шыгыремдылше шкеже шыгыремдалте», — воза «Шке огына тырше гын, нигӧ толын ок ыште» вуймутан мужыр лаштыкым айлыше статьяштыже журналист Юрий Исаков. Тудо  «Марий кинде» ГУП-ын ончычсо да «Яндар» ООО-н кызытсе вуйлатышыже Е.Петров ден  дене мутым вашталта.

! Марий Элыште чимарий-влакын кумалме ото-влакым кугыжанышын шулдыржо йымакыже налме. Нуно пӱртӱс памятниклан шотлалтыт, сандене кажне отыжо мыланна шерге.  Кузе нуно вара аралалтыт? Тидын нерген журналист Светлана Носова Марий Элын Тӱвыра, печать да калык-влакын пашашт шотышо министерствын культур поянлык объект-влакым арален кодымо, оролымо да пайдаланыме шотышто управленийжым вуйлатыше Аурика Михеева дене вашмутланымышым темла.

! Газетын спорт обозревательже Елена Эшкинина «Икшывына пиалан лийышт, сай кӱкшытыш шуышт» вуймутан статьяштыже Провой кундемысе Чакмарий села гыч ече дене спорт мастер, эмлыме пашаште тыршыше Л.Белкина дене вашмутланымашым темла. Людмила Ивановна – кеҥеж биатлон дене тӱнямбал спорт мастер Татьяна ден Надеждан авашт. Шке жапыштыже тудо шкежат тале ечызе лийын. Кузе ила спортсмен еш? Статья гыч пален налаш лиеш.

А.АНДРЕЕВ ямдылен.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *